Washington, Nailur:
Uwei u heh ka tnat Immigration & Custom s Enforcement ha ka Sngi U Blei, u la siat bad pynmynsaw ïa uwei u briew hapoh Austin, jong ka nongbah Texas bad la ong ba ki nongiakhih pyrshah ICE ki la ialeit ban ialum mar-mar sha katei ka jaka tang mar ïa iohsngew ïa katei ka jingjia.
La iathuh ba utei u briew u la mynsaw jur bha na katei ka jingjia, hynrei u la ioh ïa ka jingsumar ba kyrkieh ha kawei ka jaka sumar, hadien ba u la shah siat shisien ha ka met ha ka liang ba shatei jong ka nongbah, la iathuh ki heh jong ka nongbah Austin, ha ka jingialang bad ki nongthoh khubor.
Ka tnat pahara ri, kaba peit ïa ka ICE, kam shym la iashim bynta ha katei ka jingialang pathai khubor bad kam shym la jubab ïa ki jingkyrpad ba la ju pan jingtip bniah.
Ki ophisar pulit jong ka nongbah kim shym la donkti ha katei ka jingkhynra ne katei ka jingshah siat, kaba la jia hadien ka jingpynsangeh kali, la ong ka heh pulit jong ka Austin, ka Lisa Davis, haba ai jingtip sha ki nongthoh khubor ryngkat bad u nongmihkhmat jong ka nongbah bad kiwei kiwei ki heh sorkar.
U Mayor Kirk Watson, uba dei u Democrat, u la ong ba u kwah ba ka tnat pulit jong ka nongbah kan don bynta ha ka jingtohkit khnang ba kan lah ban ai “ki khmat kiba shai, kiba lai” ha ka jingpyntreikam. U Watson u la ong ba um tharai ba kan long kaba dei ïa ka ICE ban pynlong ïa ka jingtohkit hi dalade.
Ki nongshong shnong jong ka Austin ki don “ka hok ban sngew shngain ha ka nongbah jong ki”, la ong u Watson. Ka jingtohkit kaba biang kan pynkiew tang ïa ka jingshaniah, u la bynrap.
Ka heh ka la ong ba ym don bun ki jingshisha kiba ka lah ban ai haduh katne hadien katei ka jingjia hynrei ka la bynrap ba ka tnat tohkit ba kyrpang jong ka ka la don ha katei ka jaka.
U nongïasaid aiñ jong ka immigration uba mihkhmat ïa ka ïing ka sem jong utei u rangbah u la ithuh ïa u kum u Wilber Rafael Garces Perez uba dei u rangbah ba 28 snem ka rta na Venezuela.
Ka nongïasaid aiñ, Kate Lincoln Goldfinch, ka ong ha ka video, kaba la buh ha ka Instagram jongka, ba ka ngeit, ba um don kano kano ka histori jong ki kam runar bad kam don satia kano kano ka hukum ba khatduh, ban weng noh ïa u, na U.S., hynrei kham hadien, ka la ïathuh ha ka The Associated Press, ba kam tip satia ïa ka jinglong jingman jongu mynta ha ka jingwan buhai shnong. Ki baha-ïing jong utei u briew, ki la ïaleh shitom ban ïoh ïa kino kino ki jingtip na ka Hospital, halor ka jinglong jingman jongu ne ka jaka ba u don, ong u Lincoln-Goldfinch.
Tang shwa ka por 7 baje janmiet, ïa ka tnga jong utei u briew la pyntip da u nongïasaid aiñ jong katei ka hospital ba ïa utei u briew la pyllait noh sha ka jingtohkit jong ka ICE katto katne kynta mynshwa, la thoh u Lincoln-Goldfinch ha ka jingthoh sha ka AP.
