United States, Nailur:
U President Donald Trump, u la ïakynduh ïa ka nongïalam ba shipor jong ka Venezuela, ka Delcy Rodriguez, ha shilynter jong ka jingïalang jong ka UN General Assembly, ha ka Sngi Ba-ar, katkum ka khubor jong ka White House, ha ka jingïakynduh markhmat ba nyngkong eh hapdeng jong ki.
Katto katne ngut ki heh jong ka US ki la ïadon lang ha kane ka jingïalang nalor u Trump, la ïathuh uwei u heh jong ka White House, ba kynthup ïa u nongai jingmut ba ha khlieh duh u Stephen Miller, ka heh jong ki nongtrei ka Susie Wiles, u symbud tnat pla tyngka u Scott Bessent bad u symbud tnat bar jylla u Marco Rubio.
Ym shym la lah ban ioh jingtip shuh shaphang katei ka jingïalang.
U Rodriguez, uba la thmu ban ai jingkren ha ka dorbar bah jong ka United Nations, ha ka sngi thohdieng, u dei u khlieh duh jong ka Venezuela, uba nyngkong eh ban leit jngoh, naduh ba u president ba la pynhap shuki, u Nicolas Maduro, ula shah kem ha ka jingkhynra jong ki shipai jong ka US, ha u bnai Jymmang.
U Rodriguez, u dei u vice president jong ka Venezuela, ha ka jingsynshar jong u Maduro, hynrei, haduh mynta, u la ïatreilang bad ki jingdawa jong ka Washington, kynthup ïa ka jingai lad ïa ka US, ban rung sha ki jaka buh umphnïang ba heh jong ka Venezuela, kaba heh tam ha ka pyrthei.
U Trump, u la kdew ïa ka Venezuela, ha ka por ba u ai jingkren ha ka UN ha ka Sngi Ba-ar, da kaba ong: “Haba phi pynïasoh lang ïa ka America bad ka Venezuela, ngi don palat 60 percent ka umphnïang ha ka pyrthei.”
