Srinagar, Nohprah:
Ka kynhun National Investigation Agency (NIA) ka la pynlong ïa ka jingkhynra kaba jur ha ka sngi Palei ha ki 19 tylli ki jaka ha kylleng jong 8 tylli ki jylla kum shi bynta jong ka jingtohkit kaba dang ïaid shakhmat halor ka jingkynnoh ba ka don ka jingthmu ban khring ïa ki samla kiba don ha Pakistan bad ban pynsaphriang ïa ki kam pyntriem ha India.
La ïoh ban kurup ïa shibun ki jingthoh kiba long beaiñ, ki tiar pyndonkam kiba kynthup ïa ka Mobile Phone, Pen Drives, CD, Hard Disks bad kiwei kiwei, ha ka por ba la pynlong ïa ka jing-leit khynra ha kiba bun ki jaka kiba kynthup ha Assam, Maharashtra, Uttar Pradesh, Bihar, West Bengal, Jammu and Kashmir, Rajasthan bad Gujarat.
Ïa kine ki tiar la khmih bniah ban lapdien ïa ka jingïasuhbuit sniew bad ïa ki briew kiba la donkti ha kine ki kam pyntriem jong ka kynhun JeM hapoh ka ri India.
Ka kynhun pyrshah lehnoh, kaba dang tohkit ïa katei ka mukotduma katkum ka aiñ ïada na ki kam beaiñ, ka la thmu ïa ki jaka ha ka jingkhynra kaba la sdang ha ka por mynstep.
Ha Jammu & Kashmir, ïa ka jingkhynra la pynlong ha ki jaka jong ki nongïarap ba jan jong uwei uba la shah kynnoh, u Sheikh Sultan Salah Uddin Ayubi uba la shah khot sin kum u Ayubi, uba la shah kynnoh ba u dei u nongbud jong ka JeM.
U Ayubi u la shah kem ha u bnai Risaw namar ba u la pynphriang ïa ki kot pynphriang khubor kiba ïadei bad ka JeM, bad u la pynlong ïa ki samla ban leh pyrshah bad pynrung ïa kiwei pat ki samla sha ka kynhun Jamaat ba la pynshlur da ka JeM.
Katkum ka jingïathuh ka tyllong khubor, la ong ba ki jingkhynra ki dei shi bynta jong ka jingpyrshang kaba kham tyngeh ban pynduh pyndam noh ïa ka rukom kyrshan pisa bad ka rukom treikam jong ka seng lehnoh ba la khang pyrshah.
Ki jaka ba la pynlong ïa ka jingkhynra mynta ka sngi ki long ha Goalpara (Assam); Aurangabad, Mumbai, Amravati (Maharashtra); Jhansi, Bareilly, Deoband bad Saharanpur (Uttar Pradesh); Sitamarhi (Bihar); Hooghly (West Bengal), Baramulla, Reasi, Budgam, bad Anantnag (Jammu and Kashmir); Dungarpur (Rajasthan), bad Mehsana (Gujarat).
Ha kajuh ka por, ka kynhun tohkit ha ka sngi Palei ka la kem ïa uwei u samla na Amaravati distrik kaba ha Maharashtra halor ka jingsuba ba u don jingïadei bad ka kynhun lehnoh JeM kaba don ha Pakistan, la ïathuh ki pulit.
Ka jingkhynra hynnin ka miet ha Chhaya Nagar ha katei ka distrik hadien ba ka kynhun NIA ka la ïoh jingtip ba utei u samla u la ïakynduh bad ki heh jong ka kynhun JeM ba la shah ñiew beaiñ ha kine ki hynriew bnai ba la dep, ki la ong.
La kem ïa utei u samla bad la tohkit ïa u da ka kynhun tohkit, la ïathuh ki pulit khlem da ai jingtip shuh shuh halor kane.
