Aqaba, Nohprah:
Ka United States ka dang trei shitom halor ka jinglap ïa uwei u nongshong shnong jong ka America ha ka sngi Palei ha Syria ban wallam noh ïa u sha la ïing, ong u Secretary jong ka US, Antony Blinken ha Jordan ha ka jingïalang ban ïakren halor ka jingkylla saiñ pyrthei jong ka Syria.
Ha ki lad pathai khubor la ïathuh ba utei u briew la tip kyrteng kum u Travis Timmerman.
“Ha kaba ïadei bad u nongshong shnong jong ka America uba dang lap tang mynta ka sngi, ngam lah ban ai ïa phi ïa ki jingtip bniah shaphang kaei thik ka ban sa jia, lait noh tang ba ngi dang trei ban wallam noh ïa u na Syria bad ban wanrah ïa u sha la ïing,” ong u Blinken ïa ki nongthoh khubor ha Aqaba,
“Hynrei namar ki daw jong ka jingdonkam ban long buhrieh shwa, ngam lah ban ïasam shuh shuh ïa ki jingtip ba bniah halor kane,” la bynrap biang u Blinken.
Ka CBS News, ka ïathuh ba U Timmerman, u la pynithuh ïalade, ba u dei u nong America, uba na Missouri bad la pyllait na kawei ka patok ha kaba sdang jong katei ka taïew. Kane ka jia hadien ba ki kynhun pyrshah jong ka Syria ki la pynhiar shuki ïa u nongsynshar ba la jlan jong katei ka ri u Bashar al-Assad ha ki sngi kut taïew.
U Assad u la phet sha Russia hadien ka thma pohïing kaba la neh 13 snem bad palat sanphew snem ka jingsynshar donbor jong ka longïing jong u ha kaba ka Syria ka la pynïaid ïa kawei na ki jylla pulit kaba pynshitom beiñ tam ha Middle East.
Hadien ba la weng noh ïa u, ki nong Syria ki la tuid sha ki patok kiba pawnam ha kaba la antad ba ka sorkar Assad ka la set da ki phew hajar ngut ki nongshah set byndi.
U Blinken u la bynrap ruh ba ka jingpyrshang ban wad ïa u Austin Tice, uwei pat u nongshong shnong ka US uba la shah rahbor ha Syria palat shiphew snem mynshwa ka dang ïaid shakhmat.
“Ym don jingpynbna halor u Austin Tice, lait noh tang ban ong ba man la ka sngi, ngi dang trei ban wad ïa u bad ban ïoh wallam ïa u sha ïing, da kaba pynthikna ba ka jingpynbna kan mih sha baroh ba kane ka dei ka jingthmu ba kongsan jong ka ri America”, la ong u Blinken.
U Tice, u dei u shipai duriaw barim jong ka US bad u nongthoh khubor laitluid. U don 31 snem ka rta ha ka por ba u shah rahbor ha u Nailar 2012 katba u dang thoh khubor ha Damascus.
U President, Joe Biden u la ong ha ka Sngi U Blei ba ka sorkar US ka ngeit skhem ba u Tice u dang im. U la bthah ïa ka kynhun jong u ban leh ïa kaba donkam ban ïoh wanlam ïa u Tice sha ïing, katkum ka jingong jong ki briew kiba tip bha ïa katei ka jingbthah.
