New Delhi, Nohprah:
Ka MP jong ka seng Congress, Priyanka Gandhi Vadra, ha ka Lah Sngi U Blei, ka la pynshisha ha Lok Sabha, ba ïa ka dur jong ka Pakistan, kaba la wan pyndem hakhmat ki shipai India ha Dhaka, la weng noh na ka jaka treikam jong ki shipai.
Haba wanrah ïa kane ka mat ha ka kynta kylli jingkylli, ka Priyanka ka la ong ba ïa kane ka dur la weng noh ha kane ka sngi, kaba jia ryngkhat ruh ba ka dei ka dur jong ka Vijay Diwas. Da kaba pynpaw ba ka jingweng noh ïa katei ka dur ba pawnam ka dei ka jingpynjah burom ïa ka jingkynmaw jong u Field Marshal Manekshaw, u General Arora bad u Brigadier KS Chandpuri, bad namar kata ka Vadra ka la pan ban pynphai biang mardor ïa ka jaka tynrai.
Ka MP ka Wayanad ka la kynmaw ïa ka bynta jong ki shipai bad ki Martir kiba la ïakhun ïa ka thma jong u snem 1971 hapdeng ka India bad ka Pakistan. Ka thma ruh ka la pynlong ïa ka jingpyllaitluid ïa ka Bangladesh. Haba kren sha ki nongthoh khubor shabar jong ka Parliament, ka Priyanka ka la ong ba ka kwah ban kren ha kaba ïadei bad ka Vijay Diwas, hynrei ym shym la shah ïa ka ban pyndep ïa ka jingkren jong ka.
Shuh shuh ka la kyrpad ïa ka sorkar kmie ban pynthikna ïa ka jingïada bad jingshngaiñ jong ki rit paid ha Bangladesh. Ka MP ka Wayanad ka la ong ba ka kwah ban ïathuh kumno ka sorkar jong ka Indira Gandhi ka la ïalam ïa ka ri ha ka thma Bangladesh.
Ka la ong ba ka dei ka thma jong ki nongrim ha kata ka por. Ka la ïohi ba kum kane ka jinglong ka la mih ha Bangladesh mynta, ha kaba ki rit paid kum ki Hindu bad ki Khristan ki shah thombor. Ka la ong ba ka kwah ban ïathuh ïa ka sorkar ban pynthikna ïa ka jingshngaiï jong ki bad ban ïakren bad ka sorkar Bangladesh halor kane ka kam.
