Vanuatu, Nohprah:
Uwei na ki nongsakhi haba iakren bad ki nongthoh khubor ha ka Sngi Ba-ar, u la iathuh ba utei u jumai uba jur bha u la pynkhynñiuh ia ka dewlynnong Vanuatu jong ka Pacific ha katei ka Sngi Ba-ar bad kaba la pynjulor ia ki jingtei ha ka nongbah Port Vila kynthup ïa kawei kaba don ka US bad kiwei kiwei ki Embassy ha katei ka nongbah.
Utei u jumai, la ong ba u la khlaiñ bor bha haduh kumba 7.3 Magnitude, ha kaba ka jingjylliew jong u ka long haduh kumba 57 kilomitar (35 mail), ha ka jing jngai kumba 30 kilomitar na ki rud duriaw jong ka Efate, ka ïew bah jong ka Vanuatu bad uba la wan pynkhynñiuh ha ka por 12:47 baje mynsngi (0147 GMT).
Ka mala ba shapoh jong kawei ka jingtei kaba don ki tnat treikam ba ju dei khmih ia ki briew ka US, France bad kiwei kiwei ki embassy ka la julor noh ha katei ka jingkhynñiuh ha katei ka sngi.
U Thompson u la ong ba ha ka mala ba shapoh la buh ia ka tnat treikam jong ka US. Ia kane ym shym la lah ban pynthikna mardor la ki don kiba shah ktah ne ngat ha katei ka jing julor.
Kumta, na ka liang ka America, ka la khang noh ïa kane ka tnat Embassy tad haduh ban da pynmih da kawei pat ka jingpynbna ynda ka jinglong- jingman ka la biang bha bad ynda la ioh ban pynbha biang pat ia katei ka iingmala ba la julor ha katei ka sngi.
Kumjuh ruh la ong ba ka New Zealand High Commission ruh kaba don lang ha kajuh ka iingmala, ka la shah ktah lang bad julor bun na katei ka jingkhynñiuh ha katei ka jingjia bad kumta ruh la ong ba ki kam jongka baroh ki la sahteng bad thud noh baroh namar ka jing julor noh jong katei ka iingmala kaba heh.
