Jowai, Nohprah 18
Ka jingpynkhreh na ka bynta ban pynlong ïa ka 6th Meghalaya Games ka ban long ha Jowai bad Wahïajer, ka dang ïaid shaphrang ha kaba kin don palat 4,000 ngut ki nongïalehkai lem bad 450 ngut ki official ki ban ïashim bynta ha kane ka lympung kaba heh ha ka Jylla.
Ïa kane ka lympung yn sdang naduh 20 haduh ka 25 tarik u Kyllalyngkot jong u snem ban wan.
Na ka liang ka organising committee ryngkat bad ki state level committee ki la pynlong ïa ka jingjurip bniah ïa ka jaka ïalehkai bad jaka sah ha ka 17 tarik mynta u bnai da kaba sdang na Wahïajer Sports Complex bad hadien la pynbud sa ka jingïalang bishar na ka bynta ki kam ki jam ha conference hall ka tnad Soil and Water Conservation, Jowai, West Jaiñtia Hills District.
Ka jingplie pyrda ïa kane ka lympung kan long ha Wahïajer ha ka 21 tarik u Kyllalyngkot bad yn pynkut ha Jowai ha ka 25 tarik jong u juh bnai.
Ha kane ka jingleit jurip la ïadonlang u Director ka tnad ïalehkai u Dikki D. Shira, u Organising Secretary Bah Finely Pariat, ki Assistant Director Bah PB War Nongbri bad u Khroobok Passah, bad ka Additional Deputy Commissioner ka Kong D.V Lyngdoh bad ki nongïalam jong ki committee bapher bapher.
U Working President ka Meghalaya State Olympic Association, Bah John F. Kharshiing, u la ban jur ïa ka jingkordor jong ki jingïalehkai kum ka rynsan ïa ki samla ban pyni ïa ka sap ka phong jong ki.
U Bah Kharshiing u la ïaroh ïa ki kam pynroi ha Jowai, kum ki surok kiba la pynbha, ki skul bad kiwei kiwei. U la kdew ïa ka jingkyrshan kaba la ïoh na ki Dorbar Shnong bad u la ai khublei ïa u Symbud Myntri Rangbah ka Jylla, Bah Sniawbhalang Dhar bad u MLA ka Jowai, Bah Wailadmiki Shylla kiba la shim khia bha ban pynïaid shakhmat ïa ki kam ki jam.
Ki jingtei kiba la ïaid shakhmat ki kynthup ïa ka pung jngi kaba 25 meter ha Kiang Nangbah Government College, wat la ïa ki jingïalehkai yn pynlong shwa ha Shillong. Ïa ka Golf yn pynlong ha Assam Rifles, katba ïa ka jingïakop siat suloi kaba 10 meter yn pynlong ha Chilliangraij Dorbar Hall namar ka jingslem ban shna ïa ka jaka ha Khliehtyrshi.
Na ka liang u organising secretary, Bah Finely u la kyntu ïa ki paidbah nongshong shnong ban ai ka jingkyrshan ïa kane ka lympung. “Kane ka lympung bah ka Jylla kan wanrah ïa ki jingmyntoi kiba khraw, ym tang na ka bynta ki nongïalehkai hynrei na ka bynta ki skul bad ka imlang-sahlang,” la ong u Bah Finely bad bynrap ba da ka jingwan ka Meghalaya Games ka Jowai kan ïoh ïa ka jaka ïalehkai kaba pura kum ka swimming, boxing, ki badminton court kiba ïa ryngkat bad ka National Standard bad kiwei kiwei.
Shuh shuh la pyntip ba ha ka taïew khatduh jong mynta u bnai (Nohprah), ka organising committee kan shong bishar kam ban pynbiang ïa ki jingdonkam baroh ban pynurlong ïa ka Meghalaya Games kumba la angnud bad khmih lynti.
