Amlarem, Risaw 22
Ka BC Padu Shnong ka la khur jingjop ha ka lympung ïalehkai 3rd Division ba la pynïaid da ka Amlarem Subdivisional Sports Association (ASSA), hadien ba ka la pynliem noh ïa ka Rem Pakhiaw SC Satpator da 3-0 kol ha ka sngi Palei ha Mini Stadium, Ladjaplem.
Ha kane ka jingïakhun ka Padu Pdeng Shnong ka la lah ban ïalehkai bha naduh kaba sdang ha kaba ka la ïoh ban thep ar kol ha kylla step lyngba u Pynshai Mukhim ha ka minit kaba 15 bad u Teibor Mukhim (25). Kane ka kynhun ka la thep biang sa shi kol ha ka kylla miet lyngba u Nangaibor Mukhim (58) na ka bynta ban khur syndon ïa ka jingjop.
Ha ka jingïalehkai kaba bud hapdeng ka Padu Nongthymmai bad Amsyrwai ki la ïakhaid mar 1-1 kol. Ka Amsyrwai ka pynkhih jar nyngkong lyngba u Wanbor Phawa (43), hynrei ka Padu Nongthymmai ka la pynphai kylla lyngba u Klur Pohsnem (46).
Haba phai sha kawei pat ka jingïalehkai hapdeng ka Ladjaplem bad Thawusdiah ki la kut ha ka jingïakhaid hadien ba kim shym la lah ban pynkhih jar.
