Shillong, Risaw 22
Kum shi bynta ban plie lad ïa ki khun samla ba don ïa ka sap ha ka jingïalehkai badminton, ka Lumparing Sports Club ryngkat ka jingïatrei lang bad ka District Sports Promotion Society, East Khasi hills, District ka la pynlong ïa ka Badminton Tournament ha kaba ka phang pdeng ka long ‘Smash, Serve, Win’.
Ïa kane ka jingïakob, la pynlong naduh ka 17 haduh ka 21 tarik mynta u bnai Risaw ha Indoor Stadium jong ka Lumparing Sports Club.
Ïa kane ka jingïakob la pynlong da ka jingphiah ïa ki kyrdan ïalehkai bapher bapher, kaba kynthup naduh ka U-14, U-16 haduh ka U-18, ha kaba la wan ïashim bynta lang ruh wat da ki khynnah ne ki samla ïalehkai na ki Jylla ba marjan bad ka thaiñ shatei lam mihngi.
Ha kaba kut jong kane ka jingïakob, jong ka U-14 ki kynthei la khur da ka Tezayah B.Jyrwa hadien ba ka la pynliem noh ïa ka Anjali Sharma, katba ha ka liang ki shynrang pat la jop da u Abraham Debbarma ïa u Nilesh Jha.
Ha ka U-16 jong ki kynthei, la jop da ka Josie Hadem ïa ka Tezayah B.Jyrwa, bad na ka liang ki shynrang pat la jop da u Haegan Diengdoh ïa u Mousum Hiloidari.
Ha ka U-18 pat, ïa ka nam lahduh la rah da ka Josie Hadem hadien ba ka la lah ban pynliem noh ïa u Kiipa Paotei, bad na ka liang ki shynrang la jop da u Thungnam Maimai ïa u Mousum Hiloidari
Katba ha ka Men’s Doublues la rah da u Ruzevo bad u Sewang hadien ba u la lah ban pynliem noh ïa u Aryan bad u Shubham.
Ïa ki khusnam la sam da u MDC ka Laban -Mawprem Constituency u Bah Ricky Shullai kum u kongsan ha ryngkat ka jingdon lang u Vice President ka Meghalaya State Badminton Association u Bah P. Laloo lem bad ki dkhot nongkitkam ka Lumparing Sports Club.
