Jowai, Risaw 22
Ka Shillong Police FT ka la long ka lahduh ha ka lympung ïalehkai 2nd Division (L) Joybell Suiam Memorial Football League ba la pynïaid da ka Thadlaskeiñ Sports Association (TSA), hadien ba ka la lah ban pynliem noh ïa ka Mupliang Goodwill FC da 3-0 kol ha ka jingïalehkai phainal kaba la long ha Multi Sports Complex kaba ha Wahïajer ha ka sngi Palei.
Kane ka la wan urlong lyngba ki kol ba la thep da u Angisius Mukhim ha ka minit kaba 31, kumjuh u First Pillar Suchiang (69) bad u Ïarboklang Kshiar (70).
Ïa ka nam Best Goalkeeper la ïoh da u Wankerlang Marboh, ka nam Man of the Match la ïoh da u Ïarboklang Lshiar bad ka nam Top Scorer ka leit sha u Ïohbor Nonglyer, uba la thep haduh 22 kol ha kane ka lympung. Baroh lai ngut kine ki rangïalehkai ki dei na ka Shillong Police FT.
