Shillong, Risaw 22
Ka lympung ïalehkai 5th KIO North East Zone Karate Championship kan sdang mynta ka sngi Thohdieng ha kane ka nongbah ha kaba yn ïashim bynta da palat 900 ki nongïalehkai karate lem bad ki official.
Ïa kane ka lympung ïalehkai kaba ar sngi kynthih yn pynlong da ka All Meghalaya Karate-Do Association (AMKA) hadien ba ka la ïoh jingbit na ka Karate India Organisation (KIO), ha Convocation Hall jong ka skulbah NEHU bad yn kyrshan lang da ka tnat ïalehkai jong ka Sorkar Jylla.
Ïa kane ka lympung, yn plie da u Myntri ka tnat ïalehkai u Bah Wailadmiki Shylla ha ka por 3 baje nohphai sngi ha kaba yn ïadon lang u Director ka tnat ïalehkai Bah Alertson Nongbri kum u symbud kongsan, u President ka KIO u Bharat Sharma ha ryngkat ki dkhot ka AMKA.
Ka jylla Meghalaya kan sei 292 ngut ki nongïalehkai ki ban mihkhmat ha kane ka lympung. Kiwei pat ki nongïalehkai karate na ki 6 tylli ki Jylla ki la wanpoi ha kane ka nongbah na ka bynta ban pynkhreh ïa kane ka lympung.
Kumba ka paw ki khynnah ka AMKA ki la lah ban pynpaw ïa ka jingtbit ha u snem ba la lah ha Itanagar da kaba ki la lah ban khur 62 tylli ki takma.
Ki nongïalehkai ki ban shim bynta ha kane ka lympung, ki kynthup ïa u Daniel Dabiangbha Warjri, uba la khur ïa ka takma ksiar ha ka Boys’ Junior Individual Kumite (-68kg) bad u Gideon Tympuiñ, uba la khur ïa ka takma rnong ha ka Men’s U-21 Individual Kata. Kine ki nongïalehkai ki la khur ïa kitei ki takma ha ka South Asian Karate Championship 2026.
Kiwei pat ki khlur ïalehkai ki kynthup ïa ka Kynjailin Lyngdoh Mawnai, kaba la khur ïa ka takma rnong na ka bynta ka India ha ka 9th South Asian Karate Championship kaba la long ha Colombo ha u snem 2025. Kumjuh u Fadrik Wanñiang, Aventinus George Mylliem, Samebanmerbha Blah, Ïalam -phang Kharkongor, Princey A Blah Pohti, Adella Nongrum, Esaranaki Kharjana, Sandameka V Langstieh, Daïarisa Nongrum, Rebeka Nong -spung bad ka Barisha Kharbani, kiba la khur takma ksiar ha u snem ba la lah ha Itanagar.
Haba phai sha ki nonghikai ne ki coach jong kane ka kynhun ki long Mingson Rymbai bad u Arjun Sewa, kum ki head coach, katba ka Wandashisha Warjri bad u Ronald L Nonglait kum ki assistant coach. Katba ki manager jong ka kynhun ki long ka Laiarisa Nongrum, Beautiful Mary Mylliem, Rose Mary Tympuiñ, Junita Rani bad ka Aihunlang Makdoh, katba ka Sharailang Nongneng Shanpru kum ka physiotherapist.
Kane ka lympung ka dei kaba kongsan namar ki nongjop kin ïoh rung sha ka KIO Inter-Zonal Karate Championship 2026, ka ban long ha New Delhi ha ka 16-17 tarik u Nongprah.
Na ka liang ki rephri bad ki coach ki la ïashim bynta ha ka ‘Seminar and Examination’ hynne ka sngi. Ki la don 21 ngut kiba la shim bynta na Meghalaya ha kane ka prokram, ha kaba la pynïaid da u Premjit Sen, Chairman ka KIO’s Referee Commission.
