Shillong, Nohprah 18
Ka jingpynlong ïa ka Mawphanlur Runsafari Half Marathon 2024 ha ka 14 tarik ha ka shnong Mawphanlur ka la long kaba jop ha kaba la wan shim bynta da 313 ngut ki nongmareh kum na Delhi, West Bengal, Guwahati bad kumjuh na kane ka Jylla.
Ïa kane ka jingïakop mareh la pynïaid da ka Real Sports India (Spor-tive) ba la kyrshan lang da ka tnad jngohkai jong ka Sorkar Jylla, ka tnad jngohkai jong ka sorkar pdeng, ka Social Empo-werment Department jong ka Jylla, ka tnat ïalehkai jong ka Jylla, ki bor pynïaid district lem bad ki nongshong shnong jong ka Mawphanlur.
Ïa kane ka jingïakop la plie da kaba kaweh ïa ka lama da u Amit Gupta, Assistant Director jong ka Indiatourism Shillong, bad u Bah Clement Phor -word Mawkon (Addl. Deputy Commissioner) lem bad u Bah Francis Sordar, Rangbah Shnong Mawphanlur.
Ha kane ka jingïakop ki don haduh lai bynta ki jingïakop mareh kiba kynthup ïa ka 21 km, 10 km & 5 km. Napdeng ki nongmareh kum u D.D.Shira, Director ka tnat ïalehkai jong ka Sorkar Jylla, u Dr. Swapnil Tembe, Director ka tnat pule puthi ki la lah ban pyndep ïa ka jingïakop mareh kaba 21 km. U ba rangbah tam ban shim bynta ha kane ka jingïakop u dei u Shishir Shahoo, 72 snem ka rta u la lah ban pyndep ïa ka jingmareh kaba 10km.
Ïa ka nam nongjop ha kane jingïakop mareh kaba 21km ha ka liang ki kynthei la jop da ka Nerisa Nongrum, ba-ar ka Ibanuilen Khongwir bad balai ka Florika Swer. Katba ha ka liang ki shynrang la jop da u Tiboklang Biam, ba-ar u Hepstarly Lyngkhoi bad balai u Donkupar Marbaniang.
Ha ka jingïakop mareh kaba 10km la rah da ka Marqeenless Ramslei, ba-ar ka Claire Zones Zala Kharbhih bad balai ka Mary Queen Pale, katba ha ka liang ki shynrang la jop da u Wankyrmen L Mawphlang, ba-ar u Wolbetstar Ramsiej bad balai u Rangkijonathan Pathaw.
Ha ka 5km jong ki kynthei la jop da ka Angelista Syiemlieh, ba-ar ka Ayden Fedenzo N Marweiñ bad balai ka Lamshwamaphei Marngar, katba ha ka liang ki shynrang la jop da u Bankerlang Rani bad balai u Keshar Prasad Gupta uba na Kolkata.
Haba kut na ka liang u Bah Clement Phorword Mawkon bad u Bah Francis ki la pynpaw ba kane ka jingïakop mareh ka long shi bynta ban kyntiew ïa ki kam jngoh kai bad khamtam eh ïa ka Mawphanlur. Ki la ai khublei ruh ïa baroh ki nongshim bynta ha katei ka jingïakop mareh bad ki la khmih lynti ba kin nang kham bun ki nongshim bynta ha ki snem ki ban wan.
