Nongstoiñ, Jylliew 29
Ka CSGH na Majai, East Khasi Hills ka la long ka lahduh bad ban khur ïa ka song pisa kaba T. 1 lak tyngka ha ka lympung ïalehkai phutbol ba la pynlong da ka Mawkaton Sports & Cultural Youth Club.
Katei ka nam tam ka la wan hadien ba ka la pynliem noh ïa ka Amigos FT na Upper Laitkseh, West Khasi Hills lyngba ka tie-breaker da 5-4 kol hadien ba ki la ïakhaid mar ar kol ha ka jingïakhun final kaba la long ha madan Mawkaton, West Khasi Hills ha ka lah sngi U Blei.
Haba phai sha katei ka jingïalehkai final hapdeng kitei ki ar tylli ki kynhun, ha ka jingshisha dei ka Amigos kaba la thep nyngkong ïa ki kol kata ha ka minit kaba 3 lyngba u Meban, bad ha ka minit kaba 39 da u Mebanlam, bad watla na ka liang ka CSGH FC ka la ïaleh katba lah ban ïakhun tyngeh ban ïoh pynphai ïa kitei ki ar tylli ki kol, hynrei haduh ba kut noh jong ka kylla step ka CSGH FC kam shym la lah satia ban pynphai.
Haba sdang pat ha ka kylla miet, ka CSGH FC da kaba ïakhun tyngeh ka la lah ban pynphai ha ka minit kaba 53 lyngba u Meban Kurkalang lem bad u ha ka minit kaba 72 da u Bankyrshan ha kaba ki la ïakhaid mar 2-2 kol haduh kaba kut ka jingïalehkai.
Kumta ha ka jing-ïashut tie-breaker, ka CSGH ka la tam da 5-4 kol ïa ka Amigos bad ban rah syndon ïa ka nam lahduh.
Ha kane ka sngi pynhap pyrda ïa kane ka lympung, ka CSGH FC kum ka lahduh ka la ïohpdiang ïa ka song pisa kaba T.1 lak tyngka ha ryngkat ka trophy, ki takma, katba ka Amigos FT kaba la wan ba-ar ka la ïoh T. 50 hajar ba la sam da u Bah W.D. Marngar, uwei na ki riew rangbah ha ka jingdonlang ruh u Bah G.J.L. Sangriang, Bah K.S Nongdkhar kum ki riew rangbah ka thaiñ, bad kiwei kiwei ki la sam ïa ki khusnam.
