Shillong, Jylliew 29
U Myntri ka tnat ïalehkai u Bah Wailadmiki Shylla ha ka lah sngi U Blei u la ong ba ka Sorkar Jylla ka la pdiang ïa ka rai ba la shim da ka Meghalaya Cricket Association (MCA) halor ka jingshah kynnoh leh kynshleiñ pyrshah ïa ki ‘thei ïalehkai kriket ka Jylla, da kaba bynrap ba katei ka rai ka la wan hadien ka jingtohkit kaba janai.
“Ïa kane ka mat la rah nyngkong da ka MCA bad hadien la rah sha ka Women’s Commission ruh kumjuh,” la bynrap u Bah Shylla haka jingïakren bad ki nongthoh khubor ha ka lah sngi U Blei.
“Ka BCCI bad ka MCA ki treikam kum kiba laitluid. Katba bun ka jinglut jingsei ka wan lyngba ka BCCI,” u la bynrap.
“Kumta kum ka Sorkar ngi burom ïa ki rai jong ki. Ngi la ïohi ïa ka jingtrei shitom bad la pynlong ruh ïa ka jingtohkit. Ka kaiphod kaba ki la rai ka dei kaba shu pynshong nongrim beit na kata ka jingtohkit”, la bynrap u Bah Shylla.
“Na ka jingïohi jong nga, ki la leh ïa la ka jong ka bynta. Ka rai ba la shim ka long katkum ka jingshem jong ki,” u la bynrap.
