Kuala Lumpur, Nohprah:
Katkum ki khubor la ong ba u Myntri kam bar ri jong ka Malaysia, un shah daiñ kuna ha kane ka sien namar ka jingdih duma ha ka jaka bym dei, la ïathuh u Myntri ka koit ka khiah jong katei ka ri ha ka Sngi Palei.
U Myntri ka koit ka khiah jong ka Malaysia, u Dzulkefly Ahmad, ha kaba sdang jong kane ka taïew u la pynsaphriang ïa ka dur jong u Myntri kam bar ri, u Mohamad Hasan, uba dang dih duma ha kawei ka jaka bam kaba don harud surok ha ka jylla Negeri Sembilan jong ka Malaysia.
Namar la ong ba ka sorkar ka la buh adong bad maham tyngeh ïa baroh ba kim bit ban dih duma ha kino-kino ki jaka bam lane ki jaka paidbah. La ong ba lada ki leh pyrshah ïa kane ka long kaba be-aiñ hapoh katei ka ri bad ka long ruh ka jingpynkheiñ ïa ki kyndon aiñ ba la buh bad la nang pynjari shuh- shuh ruh ïa ki kyndon kiba tyngeh ha u bnai Risaw jong une u snem hadien jong ka aiñ kaba la wanrah nyng-kong eh ha u snem 2019.
Kumta, ha katei ka sngi, la pyntip sha ka shlem treikam jong u Myntri kam bar ri ka Malaysia halor katei ka kam bad u Dzulkefly u la pyllait ïa ka jingkren bad jingkynthoh jong u ha ka rynsan Social Media ‘X’ ha ka Sngi Palei bad bynrap ba u Myntri kam bar ri hi u kwah ban shah daiñ kuna halor katei ka kam.
Katkum ka aiñ jong ka Malaysia, ki briew kiba shah kem ba ki dih duma ha ki jaka ba la mana, ki lah ban ngat ha ka kuna kaba haduh 5,000 Ringgit ($1,120).
U Mohamad u la panmap ha ka Sngi Balang bad u la ong ba u la ïohi ïa ka jingpynbna jong ka jingleh pynkheiñ aiñ jong u, kaba la pynpaw pyrthei da ka tnat ka koit-ka khiah hynrei ïa ka kuna ym pat lah ban pynthikna.
Kumjuh, utei u heh u la kular ba u kloi ban siew ïa katei ka kuna hynrei u kyrmen ba kata ka jingshah daiñ kuna jong u kan ym long kaba heh.
Haba ïa dei bad kane, la ong ba katei ka dur ba la saphriang paidbah jong u Mohamad uba dang dih duma sahuh ha katei ka jaka bam, ka la wanrah ïa ka jingbitar jong kiba bun ki paidbah ha ki rynsan Social Media ha kane ka taïew.
