Khliehriat, Nohprah 19
Ka Thangskai Tiger SC ka la long ka lahduh ha ka Super Division Football Tournament (4th Kyrmen Shylla Contribution Tro-phy) ba la pynïaid da ka East Jaiñtia Hills District Football Association (EJHDFA), hadien ba ka la lah ban pynliem ïa ka Dhana CSC da 1-0 kol ha ka jingïakhun Final kaba la long ha ka Sngi Palei ha madan Artificial Turf Diengshynrum, Khliehriat.
Wat la ka Dhana CSC ka la pynkhih lut katba lah la bor ban ïada ïa ka kut lajong, hynrei u Solmon Sympli uba don ha ka jaka kaba biang khlem da shah pynthut ha ki nongïalehkai ba shadien ka liang pyrshah, u la ïoh ban thep ïa kol ha ka minit kaba 69 bad pynlong syndon ïa ka Thangskai Tiger ba kan long ka lahduh ha kane ka aïom.
Lyngba kane ka nam jop ka Thangskai Tiger ka la ïohpdiang ïa ka song pisa kaba T.1 lak ryngkat ka trophy na u kongsan u Bah Kyrmen Shylla, Myntri ka sorkar Jylla bad MLA ka thaiñ, katba ïa ka song pisa kaba T. 50,000 ryngkat ka trophy sha ka Dhana kaba wan ba-ar la sam da ka symbud kongsan ka Kong Santa Mary Shylla.
Kiwei ‘riew paw-khmat kiba la ïadonlang ha kane ka sngi ki kynthup ïa ki MDC ka JHADC u Bah Lasky Rymbai Deputy CEM bad Bah Finelynes Bareh, Bah Gautam War-jri, ADC East Jaiñtia Hills District, ka District Sports Officer (DSO) ka Kong Stephanie Rapsang nalor ki nongïalam bad dkhot nongkitkam jong ka East Jaiñtia Hills District Foot-ball Association, West Jaiñtia District Sports Association, Saipung Block Sports Association nalor kiwei kiwei.
Ïa ka nam ‘Emerging player of the Tournament’ bad ka nam ‘Player of the match’ la khur da u Solmon Sympli, ‘Goal of the Tournament’ ka leit sha u Sixkiru Lyngdoh jong ka Rymbai Ïawpynsing, ïa ka ‘Player of the Tournament’ la khur da u Harita Suchen jong ka Dhana CSC, ‘Best Goalie of the Tournament’ sha u Shaiñbor Muksor jong ka Thangskai Tiger bad ka ‘Best Team’ sha ka Dhana CSC.
La sam momentu ruh sha ka National Referee (Level 5) ka Kong Batbitbha Bareh kumjuh ïa ki rephri jong kane ka synjuk.
