Mawkyrwat, Nohprah 19
U Bah Pius Marweiñ, MLA/MDC ka Ranikor Constituency uba dei ruh u President jong ka Southern Border Sports Association ha ka 18 tarik mynta u bnai u la plie pyrda ïa ka taïew lehkmen kaba tip kum ka Ranikor Constituency Week 2024.
Ki jinglehkai kiba la pynlong ha kane ka taïew leh-kmen ki long ka jingïakop ñiah Bicycle, Swimming, Volleyball, Basketball, ïakop Rwai bad Shad, jingïakop ‘Rang bad ‘Thei Bhabriew, ïasiat khnam, Arm Wrestling bad ka jingïakop mareh marathon ha kaba u Bah Pius Marweiñ ruh u la ïashim bynta lang ha ka jingmareh marathon bad ïakop jngi.
Ïa ka jingïakop mareh marathon kaba 6 km la sdang na jingkieng Borbarsing Syiem bad pynkut ha shnong Khatphra. Ka jingïakop jngi la pynlong ha wah Umngi ha shnong Umpung bad ïa kiwei de ki jingïalehkai la pynlong ha Ranikor ha kaba la wan ïashim bynta shit rhem naduh ki khynnah rit, ki samla kynthei bad shynrang bad ki rangbah.
Ïa kane taïew lehkmen yn pynkut ha ka 20 tarik bad ha kane ka sngi la ïoh ruh ban sam ïa ki khusnam da ka song pisa bad ki syrnod ïa ki nongjop na ka bynta ka jingmareh marathon, Vollyball bad ïakop jngi.
U Bah Pius u la ong ba ka jingpynlong ïa kine ki jingïalehkai bapher bapher ka dei ka sien ba nyngkong.
