Shillong, Jylliew 25
Shi bynta ban rakhe ïa ka jingdap 39 ka rta, ka Argentina ka la pynsah nam ïa u Lionel Messi da kaba ka la pynïeng da u mot dur uba jrong tam ha Patagonia, Argentina.
La ong ba une u mot dur u long uba la pynïeng ha katei ka ri u long uba kham heh ban ïa uba la pynkhyllem noh ha Kolkata, India.
Une u khlur ïalehkai uba la don bynta bad ka kynhun ban rah ïa ka nam lahduh ha ki saw snem mynshwa, u la kynjoh sha ka rta kaba 39 snem ha ka sngi Balang, kaba long ar sngi shwa ba un pynpra ïa ka rekod jong u Miroslav Klose ha ka World Cup ha ka jinglah ban thep kol. Utei u mot dur u don ïa ka jingjrong kaba 85 phut bad uba don haduh 70 ton ka steel.
Ka jingpynïeng ïa utei u mot dur ka long ruh ha kajuh ka por ba ka Argentina ka la sdang ïa ka World Cup da ka jingjop ïa ka Algeria, ha kaba u Messi u la khur ïa ka hat-trick kaba nyngkong eh ha kane ka lympung.
“U dei u nongmihkhmat ba pura jong ka Argentina. Na ka bynta jong nga, ka la long kaba kongsan eh, ym tang kum u nongpynwan dur, hynrei kum u nongshong shnong ka Argentina,” la ong u Beroisa ba la 61 snem ka rta, uba long u nongshna ban pynwan ïa ka dur jong u Messi.
Ka jingtei ïa utei u motdur jong u Messi, ka la shim por haduh 18 bnai ban pyndep, kaba pyni ba u Messi u la dem khohsiew halor ka Lusail Stadium kaba ha Qatar, ha ka por ba u rah ïa ka nam lahduh jong ka FIFA World Cup kaba nyngkong eh. Ha katei ka jingïakhun final ka Argentina hapoh ka jingïalam u Messi, ka la lah ban pynliem ïa ka France lyngba ka tie-breaker da 4-2 kol hadien ba ki la ïakhaid mar 3-3 haduh kaba kut ka ‘extra time’, ban khur ïa ka jingjop kaba lai ha ka pyrthei naduh ba ka la rah teng ha u snem 1986.
Ïa utei u mot dur la pyni ba u Messi u phong ïa ka jersey jong ka ri jong u bad ka kti jong u kaba u la rah shalor ha ryngkat ka shympriah kti, kaba u ju leh hadien ba u la thep kol, kum ka jingburom ïa ka kmie tymmen jong u kaba la khlad noh.
Ha kawei pat ka kynroh kaba ha jaka pynïeng kali jong ka Buenos Aires, la airong ïa ka dur jong u Messi uba don ha ka jingjrong kumba 20 phut ka jingheh bad ka jingjrong kaba 18 phut.
Lah ban kdew ba ka Argentina hapoh ka jingïalam u Messi ka la jam sha ka wat kaba 32 hadien ba ka la jop ar sien ha ka jingïalehkai group. Kane ka lahduh kan pynkhreh ban ïakynduh sa ïa ka Jordan ha ka jingïalehkai kaba khatduh ka ban long ha ka sngi U Blei ha ka por 7:30 mynstep.
