Shillong, Jylliew 25
Ka kompani pynmih tiar ïalehkai na ri America, ka Nike ka la pyllait paidbah ïa ka boot ïalehkai phutbol ‘Gold Mercurial Superfly RGN’ kaba la shna kyrpang, kum ka jingrakhe ïa ka jingkynjoh kaba 20 snem kynthih ka jingïateh bad u Cristiano Ronaldo.
U Ronaldo, uba don ka jingïateh ba shi jingim bad ka Nike, u lah ban phong ïa katei ka boot, ha ka por ba ka Portugal kan ïakhun pyrshah ïa ka Colombia ha ka jingïalehkai Group ka ban long ha ka sngi U Blei.
La ong ba katei ka boot kaba rong ksiar ha ryngkat ki dak rong lieh. Manla kawei pa kawei na ki shijur la pynrung ïa ka Air Zoom Unit, ka jingkyrshan lyngba ka Flywire, bad ki bynta kiba jem kiba lah ban pynïaid ïa ka bol ha ka jingïalehkai.
La die ïa kane ka boot ha ka dor $300 (kumba T. 28,343), la pyllait paidbah ïa kine ki juti ha kylleng ka pyrthei ha ka sngi Balang, shisngi hadien ba u Ronaldo u la thep ar kol na ka bynta ban pynlong ïa ka Portugal ba kan jop da 5-0 pyrshah ïa ka Uzbekistan.
Te kumta u Ronaldo u la long u nongïalehkai ba nyngkong eh ban thep kol ha ki hynriew tylli ki jingïalehkai jong ka World Cup, bad lyngba kane ka pyllait ïa kitei ki juti ka long shi bynta ban rakhe ïa ka jingshim bynta une u khlur ïalehkai mynta la kumta 20 snem.
Ha ka kam kaba la batai da ki rekod, ka jinglah ban shah bad ka jingangnud, u Ronaldo u la pyni sa shisien ba ka rta ka dei tang ka jingkheiñ. Katba ka madan kaba heh tam jong ka phutbol ka dangpdiang sngewbha ïa u na ka bynta ka World Cup kaba hynriew, u la jubab ha ka rukom kaba tang kawei kaba u tip — da kaba thaw ïa ka khana ha ka jingïalehkai jong u.
U Ronaldo u la thaw ïa ka rekod jong ka jingïalehkai da kaba thep ar kol ha kaba ka Portugal ka la lah ban pynliem ïa ka Uzbekistan da 5-0 kol. U Nuno Mendes bad u Rafael Leao ruh ki la don bynta ha ka jingthep, katba ka kol ba la thep hi da u nongapkol ka Uzbekistan, u Abduvohid Nematov, ka la pynkhlaiñ ïa kane ka kynhun jong u Roberto Martinez, kaba la ïoh ïa ka jingjop ba nyngkong ha kane ka lympung.
Haba pynpaw hadien ba la kut ka jingïalehkai, u Ronaldo u la ong ba ka kynhun ka la pyni ïa ka jingkiew kaba paw bha na kaba sdang jong ka jingïalehkai da kaba ka la ïakhaid pyrshah ïa ka DR Congo. Watla u kam ba ka jingpynpra ïa ki rekod ka long kaba kyrpang, hynrei u la ban jur ba ka jingthmu ba kongsan jong u ka long beit ban ïarap ïa ka kynhun ïalehkai ka ri ban poi sha ka thong jong ka.
“Ka kynhun ka la leh bha shisha bad ka la nangkiew ha ka rukom ïalehkai. Kumba ong ka ktien, manla u lyoh u don u laiñ. Ka paw shai ba ki rekod ki long kiba itynnad shisha, hynrei ka thong jong nga ka long beit ban ïarap ïa ka kynhun ïalehkai ka ri ban pynurlong ïa ki jingthmu jong ka,” la bynta u Ronaldo.
