Shillong, Nohprah 20
Ka St Anthony’s Cricket Academy bad ka Shillong Cricket Academy ki la khur ïa ka nam lahduh ha ka kyrdan ïalehkai U-19 jong ki kynthei bad U-14 jong ki shynrang jong ka 1st SYM Inter Academy Tournament ha ka sngi Ba-ar.
Ha kine ki ar tylli ki jingïakhun final la Ïakhun da kijuh ki kynhun ha kaba ka kynhun ki ‘thei ïalehkai ka St Anthony’s ka la jop da 38 ron, katba ka SCA ha ka liang ki shynrang ka la jop da 22 ron run ha Don Bosco Mini Stadium, Shillong.
Ïa kane ka jingthmu jong kane ka lympung la kyrshan da ka Meghalaya Cricket Association kaba long ka synjuk ka ban pynsaphriang ïa kane ka jingïalehkai kriket ha ka Jylla.
Ka St Anthony’s kaba la shimti ban tied nyngkong, ka la kamai 105 run bad shah pynhap 4 wiket ha ki 15 over. Ka Dawanshisha Warlarpih ka la tied 38 ron kynthup ïa hynriew tylli ki ‘four’. Ka Isha ka la tied 12 bad ka Adelakmen ka la ïoh run. Katba ka Philasyrpai ka la khur 2 wiket.
Haba wan beh ïa ka thong, ka SCA ka la pyrshang ban ïakhun tyngeh ha kaba ka Srijana bad ka Laviola ki la ïoh 14 bad 13 run. Hynrei hadien ki la shah pynkhyllem baroh ki nongtied na ka bynta ban kamai 67 run ha ki 14 over.
Ka Dawanshisha ka la lah ban pynkhyllem ïa lai ngut ki nongtied ka liang pyrshah, katba ka Adelakmen bad ka Paia, kiba la ïoh mar ar wiket. Te kumta ka Dawanshisha ka la ïohpdiang ïa ka nam Player of the Final namar ka jingtbit ha ka rukom ïalehkai.
Haba phai sha ka jingïakhun final jong ki shynrang, ka SCA ka la lah ban ïalehkai bha naduh kaba sdang. Da kaba jop ïa ka kynting pisa, ka la kamai 110 run bad shah pynhap 5 wiket. U Gautam u la lah ban tied kham bun da 36 ron ha ryngkat ka jingkyrshan lang u Abdullah bad u Suraj, uba la ïoh 20 ron.
Haba wan shimti ïa ka pali kaba ar, ki khynnah ka St Anthony’s Cricket Academy ki la pyrshang ban ïalehkai bha. U Abhinav Khanal u la ïakhun tyngeh ryngkat bad u Ram ha kaba ki la ïoh mar 18 ron, katba u Unmukt Deka u la ïoh 14 ron. Hynrei katei ka kynhun kam shym la lah ban kynjoh sha ka thong bad ka la mad ïa ka jingshah rem.
