Shillong, Nohprah 20
Ka Meghalaya State Olympic Association (MSOA) ka la pynlong ïa ka ‘Annual General Meeting’ ha ka sngi Balang ha Conference Hall jong kane ka synjuk kaba ha JN Sports Complex, Shillong.
Ïa ka jingïalang la pynïaid da u Working President u Bah John F. Kharshiing ha kaba la pynlong ka jingsngapjar kaba shi minit ban kynmaw burom ia ki para dkhot kiba la khlad noh kiba kynthup ïa u Chiranjib Choudhury (General Secretary barim ka MSOA), Stadhi Nongrim, Executive Council Member) bad Eugene K. Marak, President barim jong ka Taekwondo Association).
Watla u Myntri ka tnat ïalehkai bad uba long ruh u President ka MSOA u Bah Shakliar Warjri um shym la lah ban ïadon lang, hynrei baroh ki dkhot jong ka ïing ki la mynjur lang ïa u Bah Finely L. Pariat, Joint Secretary ba un shimti kum u General Secretary ba pura ka MSOA bad la mynjur ïa ka jingwanrah na ka bynta ka kheiñ ka diah (audit report) ba la wanrah da u Bah K. Warjri, Treasurer.
Ha katei ka sngi u Bah Pariat u la wanrah ïa ka kaiphod na ka bynta u snem 2023-2024 ha kaba kyntiew ïa ka baibam bad ka khusnam pisa sha ki nongïalehkai kiba la wanrah burom ïa ka Jylla, kumjuh ka jingpynkhie im biang ïa ka Meghalaya Games, ka jingthied ïa ki tiar ialehkai Field of Play (FOP) na ka bynta ki synjuk ïalehkai, ka Talent identification Program, Elite Pathway Program, Super Elite Pathway program bad kiwei kiwei.
Shuh shuh la mynjur ruh ia ka jingthung ïa u Bah Cliff Nongrum, Vice President ka Meghalaya Football Association, kum u Executive Council Member jong ka MSOA.
