Shillong, Nohprah 20
Ka kynhun jong ka India ka la pynskhem ïa ka jinglah jong ka da kaba pynliem ïa ka Japan da 42 poiñ ha ka jingïalehkai league kaba ar jong ka lympung ïalehkai ‘tennis’ ka Asia Oceania IC Rod Laver Junior Challenge ha ka Winchester Arena kaba la long ha ka Sngi Palei.
Ka India, kumta kan sa ïoh ban shim bynta ha ki jingïakhun ha ka pyrthei baroh kawei, ka ban pynlong da ka Spain ha u snem ban wan.
Ka kynhun jong ka India ka la jop ïa ki saw sien ïakhun para marwei lyngba u Aradhya Kshitij, ka Sohini Mohanty, u Samarth Sahita bad ka Rishitha Basireddy ban pynthikna ïa ka jingïoh rung na ka jingïakhun lai kynhun.
Hadien, ki nong ïalehkai ka Japan ki la lah ban pynskhem ïalade da kaba ïoh jingjop ha ki jingïalehkai mar ar ngut jong ki khynnah shynrang bad kynthei.
Ka India ka la jop ha ka jingïakhun ha ka pyrthei ha u snem ba la dep lyngba u Manas Dhamne, u Rushil Khosla, ka Sohini Mohanty bad ka Asmi bad u Kshitij.
U kapten Vikram Anand, ryngkat bad ka kynhun ki la pdiang ïa ka khusnam na u rangïalehkai ba pawnam ha USA.
