IFL 2026-27: Mad jingshah rem nyngkong ka Shillong Lajong ha ka Dempo

Shillong, Naiwieng 19 Ka Shillong Lajong FC ka la mad ïa ka jingshah rem kaba nyng-kong eh ha ka lympung ïalehkai Indian Foot-ball League (IFL) 2026 -27, hadien ba ka la liem noh ha ka...

Shillong, Naiwieng 19

Ka Shillong Lajong FC ka la mad ïa ka jingshah rem kaba nyng-kong eh ha ka lympung ïalehkai Indian Foot-ball League (IFL) 2026 -27, hadien ba ka la liem noh ha ka Dempo SC da 2-1 kol ha ka sngi Palei ha Fatorda Stadium, Margao.

Kane ka long ka jingshah rem kaba nyngkong eh na ka bynta ka kynhun ïalehkai ka Jylla ha ka jingïakhun shabar na la ïing.

Ha kane ka jingïa-khun baroh ar ki kynhun ki la pyrshang ban ïalehkai bha naduh kaba sdang, ha kaba ki la ïoh ïa katto katne ki kabu kiba biang. Ka Dempo ka la pynkhih jar nyngkong eh lyngba u Cledson Carvalho Da Silva ha ka minit kaba 16.

Watla ka Lajong ka la shah thep shi kol, hynrei ka la pyrshang ban ïakhun tyngeh bad dei ha ka minit kaba 41 ba ka la lah ban pynïakhaid kylla lyngba u Damait-phang Lyngdoh. Hashwa ban kut artad ka jingïalehkai jong ka kylla step ba ka Dempo ka la thep biang sa shi kol lyngba u Laximanrao Rane (45’+1) na ka bynta ban tam 2-1 kol.

Hadien katto katne por ba la bteng ïa ka jingïakhun jong ka kylla miet, ki rangïalehkai ka Lajong ki la pyrshang ban ïakhun tyngeh, hynrei kim shym la lah ban pynurlong na ka daw ka jingïashan tyngeh ki rangïalehkai ka Dempo. Haduh kaba kut kine ki kynhun kim shym la lah ban pynurlong bad ha kaba kut ka Lajong ka la mad ïa ka jingshah rem.

Da kane ka jingjop ka la pynlong ïa ka Dempo ban jam sha ka kyrdan ba-ar hadien ba ka la ïaryngkat mar 9 poiñ bad ka Gokulam Kerala, kaba danglamkhmat ha kane ka lympung. Katba ka Lajong ka la hiar sha ka kyrdan balai bad 7 poiñ.

Te kumta ka Shillong Lajong kan wanphai shwa sa la ïing na ka bynta ban pynkhreh ïa ka jingïakhun pyrshah ïa ka Nagaland United ha ka 25 tarik mynta u bnai.