Champions Cup: Rung semi final ka Mawlai naba pynliem ïa ka Mawpat

Shillong, Naiwieng 19 Ka Mawlai Sports Club ka kylla long ka kynhun ïalehkai ba nyngkong ban rung sha ka semi-final ha ka SSA Champions Cup 2026, hadien ba ka la pynliem noh ïa ka Mawpat...

Shillong, Naiwieng 19

Ka Mawlai Sports Club ka kylla long ka kynhun ïalehkai ba nyngkong ban rung sha ka semi-final ha ka SSA Champions Cup 2026, hadien ba ka la pynliem noh ïa ka Mawpat SC da 3-2 kol ha ka sngi Palei ha SSA Stadium, Polo.

Ka khana jong kane ka jingïakhun ka long ba u Reform Pale (17′), u la lah ban lamkhmat ïa ka Maw-pat ban pynkhih jar nyngkong, hynrei ka Mawlai, ka la ïakhun tyngeh ha kaba ka la ïoh ban thep ar kol lyngba u Damanbha-lang Chyne (26′ & 47′) bad ïa ka kol kaba lai ïa ka Mawlai la thep da u Ricky Chyne (85′).

Hynrei shwa ba ka jingïakhun kan khreh ban jam noh sha kaba kut, ka Mawpat SC ka la ïoh ïa ka kabu ba kan thep ïa ka kol kaba ar jong ka lyngba u Sparkle Khongshei (89′), kaba pynkylla long ïa kane ka jingïakhun kaba ïakhaid bad ba ïa biang bor bha.

Lyngba  kane ka jing-jop, ka Mawlai ka la kamai 9 poiñ na ki lai sien ïakhun bad sah ha kti sa kawei pat ka jingïa-khun, katba na ka liang ka Mawpat SC, kan dei ka jingïakhun ba khatduh jong ka, bad ka la khur 7 poiñ bad ïa mynta ka dangdon ha ka kyrdan ba-ar na ka bynta ban don ha ka thong jong ka jingïoh rung semi final, hadien ba ka Mawpdang SC ka la khur 4 poiñ bad ka lah ban jam sha ka semi final lada ka lah ban pynliem ïa ka Lamlynti la sngi Saitjaiñ.

Ka Mawpat kaba bat ruh ïa ka nam kum ka lahduh ka Second Division, ka la rung sha kane ka jingïakhun hynne ka sngi, kum ka kynhun kaba khlem shah rem, kaba dei halor kane ka nongrim, ba ka la ai mynsiem bha ïa kane ka kynhun ba kan ïeng ïakhun tyngeh bha ïa ka Mawlai.

Nalor katta na ka por sha ka por, ka Mawpat ka ïaleh bha ba kan ksam lyngba ïa ka kut jong ka Mawlai, kaba don ruh ki khep ba ka la jan lah ba kan pynurlong ïa ka sha ki kol, bad ka kabu ksiar ïa kane ka kynhun ka dei ha ka minit kaba 36 lyngba u Oliver u la shu lait salit ban pynkhih ïa ka jar bad ka kylla step ka la kut ba ki ar kynhun kin lah shwa ban ïakhaid.

Haba wan ban bteng ïa ka kylla miet, ka Mawlai ka la kylla syndet ïa rukom ïalehkai jong ka, kaba hangne ka la ïoh ban pyrshang ban shut ïa ka bol sha kol lyngba u Lovingstar Suting, hadien ba ka bol kaba u la shut ka la dei beit ïa ka diengkol.

Pynban ha ki sekon bad ki minit ba ka jingïa-khun ka bteng ban jam shakhmat, ka sur ïalehkai ka Mawlai ka sdang ban hiar, kaba hangne ka la plie lad ïa ka Mawpat SC ba kan ïoh biang ban pynkhih ïa ka jar lyngba ka corner.

Haba ka jingïakhun ka la khreh jam sha kaba kut, ki rangïalehkai ka Mawlai ki la ïeng skhem ban ïada na ka jingshah thep bad ka la khur syndon ïa ka jingjop na ka Group-A.

Ka jingïalehkai jong ka Group-B mynta ka sngi Thohdieng kan long hapdeng ka Shillong Lajong FC pyrshah ïa ka Mawkhar SC ha ka por 2:30 nohphai sngi.