Jowai, Nohprah 22
U Dabit Dkhar na Sabahmu-swang bad ka Phyrnai Kyndait na Mukhaialong ki la long kum lahduh ha ka jingïakop mareh ba la tip kum ka Cross Country Run kaba 10km ha sor Jowai.
Ia kane ka jingïakop mareh la pynlong da ka National People’s Party (NPP), Ïawmusiang Unit halor ka mat pdeng “Say No to Drugs”.
Kane ka jingïamareh ka la long kaba shongshit bha kaba la sdang na Lad Nangbah bad ka pynkut ha madan Jrisaleiñ, Chutwakhu Jowai. La wan ban ïashim bynta haduh 190 ngut ki nongmareh na kylleng ka Rilum Jaiñtia.
U MLA Jowai, Bah Wailadmiki Shylla, u la kaweh ïa ka lama ban sdang ka jingmareh ha ka jingïadonlang u DSO West Jaiñtia Hills District, Bah Khroobok Passah, u President NPP Ïawmusiang Unit, Bah Eddystone Shylla nalor ki dkhot nongkitkam ka NPP Unit.
Ka jingthmu jong kane ka jingmareh ka long ban ïalap pynsngewthuh ïa ki nongshong shnong ïa ka jingsniew u drok ha ka imlang sahlang bad ban hikai ïa ki samla samhoi kynthei bad shynrang ban kiar na une u jingdih pynbuaid ba shisien ba la ngop la eh ban lait na ka jingshah khum ha u kynjri jong u drok.
U Bah Wailadmiki Shylla u la ban jur ïa ka jingïatreilang jong baroh ha ka imlang ka sahlang ban ïakhun pyrshah ïa u drok bad u la ong ba ka Sorkar Jylla ruh ka la shim ïa ki sienjam ba har rukom ban ïakhun ïa ka thma drok.
Kiwei ki nongjop ha kane ka jingmareh ki dei u Da-ïo-he-mitre Suting na Sohmynting bad u Knerlang Phawa na Tuber Kmaichnong kiba la wan ha ka kyrdan ba-ar bad balai ha ka liang ki shynrang, katba ka Heimonki Khaii na Lumshyrmit bad ka Rosy Sana na Mukhaïalong kiba la wan ba-ar bad balai napdeng kynthei.
Ka khusnam kaba kyrpang- youngest participant ka la leit sha u Lumlangki Lhuid na Ïawmusiang, bad ka oldest participant sha ka Kong Romika Pyrtuh na Sohmynting. Baroh ki nongjop ki la ïohpdiang da ka song pisa kiba la synñiang da u MLA ka Jowai.
