Shillong, Nohprah 22
U rangïalehkai shadien ka Manchester City, John Stones u la ngat ha ka jingmynsaw bad pynlong ïa kane ka kynhun ban shah rem da 2-1 kol ha ka Aston Villa ha ka Premier League kaba la long ha ka sngi Saitjaiñ.
Une u rangïalehkai ka England u la shah pynshong noh ha ka kylla step bad kane ka long ka sien kaba nyngkong jong u bnai namar ka jingpang ha ki kjat. Kata ka jingmynsaw ka la khie biang, la pynpaw u manager ka City, u Pep Guardiola.
U Guardiola u la kdew ïa ka jingmynsaw kum ka daw jong ka jinghiar ka kynhun jong u ha kaba ka la shah rem khyndai sien na ki khatar tylli ki jingïakhun ba la dep.
La pynthikna ha ka sngi Thohdieng ba u Ruben Dias un ym pat lah ban ïalehkai sa kumba katto katne taïew na ka daw ka jingmynsaw.
“Ngi don tang uwei u rangïalehkai shadien uba biang, hynrei kam pat long kaba biang na ka bynta kynhun”, la bynrap u Guardiola ha ka sngi Saitjaiñ.
Kumba ka paw ba ki kol ba la thep da u Jhon Duran bad u Morgan Rogers ha Villa Park ki la pynlong ïa katei ka kynhun kaba la khur nam lahduh hadun saw sien, ban shah rem hadien khyndai sien na khatar tylli ki jingïalehkai ha ka samoi ïalehkai kaba dang ïaid shakhmat. Ka kynhun jong u Pep Guardiola ka la jop tang shisien ha katei ka jingïalehkai.
“Ngim don ka jingïada na ka bynta ka kynhun namar ki rangïalehkai kiba ngi don kim long kiba biang”, la ong u Guardiola.
Ka Arsenal kaba don ha ka kyrdan ba lai, ka la khanglad ïa ka jingïapher pyrshah ïa ka Liverpool kaba lamkhmat ïa kane ka lympung da lai poiñ da kaba jop da 5-1 kol ha ka Crystal Palace, hynrei kan hap ban ïalehkai bha ha ar tylli ki jingïalehkai.
“Ka dei shaphang kaei kaba nga lah ban leh bad ki briew jong nga ban ïoh biang ïa ki jingjop,” la bynrap biang u Guardiola. “Lada don ka khyllipmat kaba ngam lah ban pyrkhat palat, ka dei mynta hi. Ngan pyrshang ban long uba palei jingmut jingpyrkhat ban bat skhem ïa ki nongrim jong nga bad ban ai ka jingthikna ïa ka kynhun.”
