Imphal, Nohprah:
Hadien ki jingshah thombor ba la jia biang da ki suloi bad ki bom ha Imphal East jong ka Manipur kiba la pynlong ïa arngut ban mynsaw ha ka sngi Thohdieng, u Myntri Rangbah ka jylla u N Biren Singh “u la pynrem jur ïa ka jingsiat pathar”, kaba ai jingmut ba ki pulit jong ka sorkar pdeng bad ki pulit jylla ki don ka jingïatreilang kaba biang.
Kumba arngut ki briew kynthup ïa uwei u pulit ki la mynsaw ha ka jingïasiat ha kaba ki briew kiba don tiar na ki jaka lum ki la siat da ki suloi bad ki bom ha ki shnong Sanasabi bad Thamnapokpi ha katei ka distrik, ong ka tyllong khubor.
Uwei u heh pulit u la ong ba ki bor pahara ki la shah pynbor ban pynphai kylla ïa katei ka jingthombor, kaba la pynlong ïa ka jingïakynad ban nang bthei shuh shuh.
U Myntri Rangbah u la khot ïa kane kum ka “jingthombor kaba shyrkhei bad kaba khlem daw” da ki lehnoh Kuki ” ha ki ‘riew kiba lui lui”, da kaba ong ba kane ka dei ka jinghiar thma ïa ka shongsuk shongsaiñ.
“La phah mardor ïa ki bor pahara sha ki jaka ba shah ktah. Kiba mynsaw ki la ïoh ïa ka jingïarap kaba donkam, bad ka sorkar ka khot na ka bynta ka jinglong jai-jai bad jingïatylli ha khmat kum kine ki jingeh. Ki bor pahara jong ka sorkar pdeng bad ki pulit ka jylla ki dei ban don ka jingïatreilang bad jingsngewthuh jingmut kaba biang ha kaba ïadei bad kum kine ki jingeh.” ki jinglong jingman,” u la ong ha ka jingthoh ha ka rynsan X.
Uwei u pulit ba la mynsaw ha katei jingjia la tip kyrteng kum u K Haridash uba 37 snem ka rta. Une u ophisar u la mynsaw na ka jingdei ki kuli ha ka tyrpeng sha liang kadiang bad la pynkit ïa u sha Jawaharlal Nehru Institute of Medical Sciences ha ka por kumba 3:30 janmiet, la ong u heh ophisar.
Uwei pat u briew uba la mynsaw malu-mala ha katei ka jingshah siat u dei u “nongtrei mon sngew-bha jong ka shnong”. Ki kti jong u ki la mynsaw bad la rah noh ïa u sha ka jaka sumar shimet, ha kaba la ong ba u la lait na ka jingma.
“Ki briew kiba don tiar na jrong lum ki la sdang ban siat pathar bad pynbthei bom ha ka por 10.45 mynstep ha ka shnong Sanasabi bad ki jaka marjan, kaba la pynlong ïa ki bor pahara ban pynphai kylliang da kaba siat,” la ong shuh shuh u ophisar.
