Moscow, Nohprah
Ka Russia ka pynbna ba la shna ïa u dawai ïada na ka jingpang bampong (cancer) mRNA, uba la thmu ban pynmih ha u snem 2025. Ki jingpyrshang shwa ban sumar ki pyni ïa ka jingpynduh ïa ki tumor bad ka jingpynduna ïa ka jingsaphriang. Ka jingpyniasoh lang ïa ka AI ka kular ban pynlong kyrpang ïa ka jingthaw ïa ki dawai hapoh shi kynta, kaba pynsted shibun ïa ka jingtreikam kaba jrong kumba long mynta. Kane ka dawai ka thmu ban pynkhlaiñ ïa ka jinglah jong ka bor met ban thmu bad pynduhjait ïa ki cell cancer.
Ha kaei kaba lah ban ong ba ka dei ka jinglap jong ka spah snem, ka sorkar Russia ka ong ba ka la shna hi ïa la ka jong ka dawai ban ïada na ka jingpang cancer. La khmih lynti ba yn pynmih ïa une u dawai ha kaba sdang jong u snem 2025.
“Ka Russia, ka la shna ïa la ka jong ka dawai mRNA pyrshah ïa ka jingpang Cancer, ïa kane yn sam sha ki nongpang khlem da siew pisa, ong u General Director jong ka Radiology Medical Research Center jong ka tnad ka koit ka khiah jong ka Russia, u Andrey Kaprin, ha ka Radio Rossiya,” ong ka tnad pathai khubor jong ka Russia, ka TASS.
“Ki jingpyrshang shwa ban pyndonkam ïa une u dawai ïada ki la pyni ba u khanglad ïa ka jingroi jong ki khniang jingpang bad ki jingpang ba lah ban saphriang,” ong u Director jong ka Gamaleya National Research Center for Epidemio-logy and Microbiology Alexander Gintsburg ha ka TASS.
Ha kaba sdang jong une u snem, u President ka Russia u Vladimir Putin u la ong ha ki jingkren ha ki telebishon ba “ngi la jan bha ban thaw ïa ki dawai cancer bad ki dawai pynkhlaiñ bor met katkum jong ka pateng kaba thymmai”.
