Los Angeles, K’lyngkot:
Kawei ka liengsuiñ rit ka la leit hap bakla halor ka tnum jong kawei ka iingmala kaba don ha ka nongbah California ha ka Sngi Palei, ha kaba 2 ngut ki la khlad noh bad 18 ngut pat ki la mynsaw na katei ka jingjia ha katei ka sngi.
Kane ka la jia ha ka por mynstep jong ka Sngi Palei hajan jong ka Fullerton Municipal Airport, kumba 25 Mile lane 40 Kilometre na ka phang Shathie-mihngi jong ka nongbah Los Angeles. Ka daw tynrai halor kane ka jingjia kat haduh mynta ym pat lap.
Haba iadei bad kane, la ong 10 ngut kiba mynsaw ha katei ka jingjia, la pynkit noh sha ka jaka sumar ban phah sumar bniah. Katba 8 ngut kiwei pat kiba shu mynsaw malu-mala, la shu sumar noh ha katei hi ka jaka bad ki la lait na ki jingma kiba khraw.
Ki tnat tohkit ki dang wad bniah ban tip la kitei kiba khlad 2 ngut ki dei hi ki nongpynher jong katei ka liengsuiñ ne ki dei tang ki nongshong hapoh jong katei ka liengsuiñ kaba la thud bad sangeh treikam shiteng suiñ.
Katkum ki dur ba la saphriang paidbah, la iohi ia ka tnum iing jong katei ka iingmala, kaba la pei bhung namar ka jingleit suh jong katei ka liengsuiñ beit- beit sha katei ka iing ha katei ka jingjia.
