Shillong, K’Lyngkot 03
U President ka Meghalaya Golf Promoters’ Society, Bah Daniel S. Jyrwa u la shah jied ban long kum dkhot jong ka Indian Golf Union.
Kane la wan hadien ba ka la lah ban pynlong ïa ka ilekshon ha ka 15 tarik u Nohprah ha nongbah Delhi ha kaba la thung president ïa u Harish Kumar Shetty, Vice-Presi-dent ïa u Dhiraj Seth, u Basant Kumar Repswal kum u Secretary, Manoj Joshi kum Treasurer.
Nalor u Bah Daniel, kiwei pat kiba la shah thung kum ki dkhot jong ka synjuk ki long u Mangalore Chandrashekar Kini, Bhavnish Kumar, Rana Pratap Kalita, Nee-lam Pratap Singh, Nav-deep Singh, Navita Man-singh, TS Varma bad u Ram Chander Tiwari.
Na ka liang ka Indian Olympic Association (IOA) ha ka sngi Balang ka la ithuh ïa katei ka synjuk ïalehkai jong ka Indian Golf Union (IGU) lem bad ki nongkitkam jong ka.
Kane ka jingithuh jong ka IOA ka long hadien ka jingtohkit kaba bniah halor ki ar tylli ki Annual General Meeting (AGM) ba kyrpang bad ka ilekshon kaba la long ha ka 15 tarik u Nohprah 2024, ha ki jaka bapher bapher ha New Delhi.
Ka jingïakynad ka la sdang naduh ba la mih ki khubor ba la pynlong ar tylli ki ilekshon ba ïaryngkat na ka bynta ka IGU. Katba kawei ka ilekshon la peit da u Justice O.P. Garg (Retd.), la ïathuh ba ïa kawei pat la pynïaid da kawei pat ka kynhun hapoh ka jingïalam jong u Brijinder Singh. Baroh arliang mamla ki la dawa ïa ka jinglong hok, kaba la pynmih ïa ka jingkulmar ha ka kynhun ïalehkai golf.
Ha ka shithi sha ka IGU, ka President ka IOA ka P.T. Usha ka la ai khublei kyrpang ïa katei ka synjuk ïalehkai kaba la dep jied thymmai. Ka la pynpaw ïa ka jingshaniah ha ka jinglah jong ki ban kyntiew ïa ka jingïalehkai golf hapoh ri India katba ki dangbat ïa ki jinglong ba kordor jong ka jingïalehkai Olympic. “Ngi kitbok-kitrwiang ïa phi baroh bad ngi kyrmen ba ka Dorbar Synshar ba thymmai jong ka Indian Golf Union kan ïaleh katba lah ban kyntiew ïa kane ka jingïalehkai ha India, katba ka dang pynneh ïa ki jinglong jingman jong ka Olympic,” la ong ka Usha.
