Shillong, K’Lyngkot 05
Ka Mawlai SC bad ka Rangdajied United FC ki la sdang ïa u snem thymmai da ki jingjop ha ka lympung ïalehkai Shillong Premier League 2024 hynrei ki la ïapher ha ka jingthep kol ha ka sngi Saitjaiñ ha SSA Stadium kaba ha First Ground, Polo.
Ha kane ka jingïakhun ka Mawlai kaba long la lahduh jong ka aïom ba la dep, ka la pynliem noh ïa ka Laitkor SC da 1-0 kol lyngba ka shi kol ba la thep da u Baïaikara Swer (82), katba ka Rangdajied ka la jop suk da 4-0 kol ïa ka Nongthymmai SC. Kane ka la wan lyngba u Owanijuh Pajuh (1), Benny Khriam (41) bad u RT Hanson Pdang (88 & 90+4).
Wat la ka Laitkor ka la ïakhun tyngeh naduh kaba sdang ban ym ailad ban shah rem ha ka liang pyrshah, hynrei shwa ban wai ka por ka la shah thep kol ha ka Mawlai. Ka rukom ïalehkai ka la long kaba kham pher haba ïanujor na ki jingïalehkai ba la dep lyngba ka jingdon bun ki nongkyrshan bad ka la pynlong ïa baroh ki kynhun ban ïalehkai bha naduh kaba sdang.
Ka jingbym lah ban kyrda da u rangapkol ka Laitkor, Deranius Wahlang kumba shiteng kynta eiei ka la pynlong ïa ka Mawlai ban jan ïoh da khyndait ban thep kol. Ha ka kylla miet, u Moonstar Nongsiej u la jan ïoh ïa ka Laitkor ha ka bynta kaba shakhmat hynrei u la tan ïa ka bol kham shajngai hadien ba u la jan ïoh rah ïa ka bol hapoh box.
Hadien kata, ka Mawlai ka la shah khanglad noh ïa ka corner ha shwa ba u Baïaikara un ïoh ïa ka kabu ksiar hadien 8 minit shwa ban kut ki 90 minit. Nangta ka Laitkor ka la pynkut ïa ka jingïalehkai da ki 10 ngut hadien ba u Euvasius Mawthoh u la shah sei da ka red card. Wat la na liang ki rangïalehkai ka Laitkor ki la kyrpad jur ban ïoh ïa ka ‘hand bol’ hapoh ‘box’ hynrei u rephri um shym la shim kano kano ka rai. Ka jingbitar jong u Euvasius ka la pynlong ba un kren kynthoh bad dei hangne na ka liang u rephri u la sei syndon da ka red card.
Lyngba kane ka jingjop ka la pynlong ïa ka Mawlai ban bat ïa ka kyrdan ba hakhlieh ryngkat 16 point bad ka la long ka kynhun kaba khlem pat shah rem. Hynrei ka jingjop ka Rangdajied ka la pynlong ïa ka Laitkor ban hiar sha ka kyrdan ba hynñiew.
Ha ka jingïalehkai kaba la long kham shwa, u Owanijuh u la ïoh thep kol kumba 50 sekhon ha ka jingïakhun pyrshah ïa ka Nong-thymmai namar ba u la thep kol da ka khlieh khlem don jingeh satia. Nangta u la pynbuh bol ïa ka kol ba ar da kaba ai bol sha u Benny, uba la pyndep ïa ka da kaba suk.
Kumba ka paw ka Nongthymmai kam shym la lah satia ban ïalehkai bha, watla u Ronald Singh Shaikhom u la ïoh ban rah bol arsien, nyngkong da kaba shah khanglad ha u rangapkol ka RUFC u Meshan Banjop Sumer bad kawei kaba ula ïoh ban shut.
Hynrei ka jingïakhun tyngeh da u Hanson ka la pynlong ïa ka Rangdajied ban thep biang sa ar kol hashwa ban wai da kaba u la ïoh ban shut najngai.
Hadien ba ka la shah rem ar sien ha kaba sdang jong ka SPL 2024, ka Rangdajied mynta ka la jop saw sien lynter, ha kaba ka la kiew mynta ha ka kyrdan basaw bad kamai 12 poiñ. Wat la ka dei ka jingshah rem kaba saw jong ka Nongthymmai, hynrei ka dang jop tang ar sien ha kane ka lympung ryngkat 7 poiñ na ka bynta ban ïaryngkat bad ka Langsning, kaba la tam lyngba ka jingïapher kol.
Ka jingïalehkai ha ka lah sngi U Blei kan long hapdeng ka Shillong Lajong FC pyrshah ïa ka Nongrim Hills SC ha ka por 2 baje nohphai sngi.
