Shillong, Nailar 13
Ka St. Theresa’s Upper Primary School kaba don ha ka shnong Kreit kaba danghap hapoh ka Soh-ïong Constituency ka dei kawei na ki skul kaba la sei shibun ngut ki khynnah kiba la leit ïashim bynta ha ki jingïalehkai bapher bapher shabar ka Jylla bad sha kiwei ki ri ruh ym tang ha India bad kiba la wanrah ruh ïa bun tylli ki takma.
Ha kane ka skul la seng ha u snem 1969, ki nonghikai ki don 9 ngut, katba ki khynnah ki don 100 ngut bad ka don haduh ka klas kaba phra.
Ha ka 6 tarik mynta u bnai, ki khynnah na kane ka skul kin pynkhreh ban leit sha Jammu & Kashmir ban leit shim bynta ha ka 29th National Sepak Takraw Championship 2026. Kaba sngewsih pat ka long ba kim ïoh kano kano ka jingïarap ha kaba ïadei bad ka bai leit bai wan, bai bam bad bai sah jong ki Khynnah, hynrei kin hap lut hi ki kmie ki kpa jong ki khynnah skul na bynta ki jinglut baroh bad ka skul ruh kam lah ban ïarap namar ba kim don pisa bad ba dangdon shibun ki jingduna ha ka skul.
Na ka liang ka Principal jong kane ka skul ka Kong Efrimai Mawlong kaba la bat ïa kane ka kam la kumba 30 snem, ka la ïathuh ba ki dangdon shibun ki jingdonkam na bynta ka skul kum ki shuki, ki kor pynsawa, ki kamra klas kiba biang, generator, jaka buh tiar, ki miej bad ki ben shong ki khynnah skul bad kiwei kiwei.
Ka la ïathuh ruh ba ki ben shong ki khynnah ki long kaba i sangsot haduh katta katta namar bun kiba la pei lut bad ka la ong ruh ba tang i duli ban buh ki kot ki sla ruh kim don bad ki hap ban shu buh ha i duli jot bad bun na ki tiar ruh kin hap ban shu wai.
Kaba kham sngew myllung pat ka long ba ïa ka hall jong ka skul la bei tyngka hi da ka Principal jong ka skul bad khyndiat la ïarap pisa lang da u Bah Ksanbor Kurbah ban shna ïa katei ka hall kaba la shu tap da ka tarpar bad ker da ki siej.
Ka la ïathuh ruh ba ïa katei ka hall la ïarap ban shna da ki kmie ki kpa jong ki khynnah skul bad yn plie ïa kane ka hall ha ka 14 tarik mynta u bnai da u MLA ka thaiñ u Bah Synshar Lyngdoh Thabah.
Shuh shuh ka la ong ba na ka liang u MLA ka Sohïong Constituency u la kulur ban ïarap ïa kane ka skul lyngba ka MLA Scheme.
