Shillong, Nailar 13
Ka kynhun ki ‘thei ïaleh-kai Under-17 jong ka Lit-tle Star English Medium Higher Secondary School ka la long ba la khreh ban leit shim bynta ha ka kyrdan ïalehkai Under-17 jong ka 65th Subroto Cup International Football Tournament 2026 ka ban sdang naduh 18 tarik mynta u bnai ha nongbah Delhi.
Ka jingïoh lad kane ka kynhun na ka Nongbah Bynter, Eastern West Khasi Hills ka la wan hadien ba ka la rah ïa ka nam lahduh ha ka State Level Inter School Subroto Cup, kaba la kut dangshen ha kane ka nongbah, lyngba ka jingjop ïa ka North Liberty Higher Secondary School na Jowai, West Jaiñtia Hills lyngba ka tie-breaker da 4-1 kol.
Hashwa ba kane ka kynhun kan mih na ka nongbah, na ka liang ka tnat ïalehkai jong ka Sorkar Jylla ka la pynlong ïa ka prokram kaba kyrpang ba ai khublei kitbok ïa kane ka kynhun ba kan lah ha ka ban ïalehkai bha ha katei ka lympung bad ruh ban wanrah nam bad burom ïa ka Jylla.
Ha kane ka sngi la ïadon lang u Myntri ka tnat ïalehkai jong ka Sorkar Jylla u Bah Wailadmiki Shylla kum u kongsan ha ryngkat ka jingïadon lang u Deputy Director ka tnat ïalehkai Bah Païa War Nongbri, kumjuh u Assistant Director Bah Khroobok Passah, ki coach, ki khynnah bad kiwei kiwei.
Na ka liang u Bah Wailadmiki u la ai khublei ïa ka Little Star English Medium Higher Secondary School kaba la long ka lahduh ha ka State Level Inter School Subroto Cup. “Watla kiba bun ki skul kim kwah ban wan shakhmat ban ïashim bynta ha ki kam ïalehkai, hynrei ka Little Star English Medium HSS ka la plie lad na ka bynta ki khynnah donsap da kaba ka la seng ïa ka shlem ai jinghikai ne ka academy ka bynta ban saiñdur ïa ka lawei jong ki khynnah.”
Te kumta u la ai ka jingkitbok kitrwiang ïa kane ka kynhun ba kan ïalehkai bha ha ka Subroto Cup ka ban long ha nongbah Delhi.
Nalor ka Little Star, kiwei pat ki kynhun ïalehkai ki ban mihkhmat ïa ka Jylla ki long ka North Liberty HSS (U-15 Boys) bad ka OM Roy Memorial HSS (U-17 Boys).
Lah ban kdew ba kane ka lympung mynta u snem kin don haduh 107 tylli ki kynhun kynthup ïa ka kynhun kaba na Sri Lanka, ki ban wan shim bynta ha la ki jong ki kyrdan kata ka Under-15 ki shynrang lem bad ka Under-17 jong ki shynrang bad kynthei.
Ïa ka Under-15 Boys, yn pynlong ha Bengaluru bad ïa ka Under-17 Boys & Girls yn pynlong ha nongbah Delhi.
