Jowai, K’Lyngkot 05
Ka West Jaiñtia Shooting Association (WJSA) kaba la seng naduh u snem 2016, ha ka sngi Saitjaiñ ka la pynlong ïa ka prokram ai jinghikai siat suloi Air Pistol bad Air Rifle kaba 10M (training camp) ha kaba la wan shim bynta da palat 30 ngut ki shynrang bad kynthei ha Community Hall Loomsooiung Newhill, Jowai.
Ha kane ka prokram ai jinghikai la wan ban hikai da ki Coach ba tbit na ka Shooting Association of Meghalaya (SAM) ba kynthup ïa ka Kong Balari Rani bad Kong Marba Mylliem Pdah.
Ha ka sngi sdang ki nongïashim bynta ki la ïoh ban sngap ïa ki jinghikai shaphang ka Theory, katba ha ki ar sngi kin ïoh jinghikai halor ka Practical.
U Bah Alan Niangti, President ka WJSA, u la ïathuh ba ka thong jong ka synjuk ban pynlong ïa kane ka prokram ai jinghikai ka long ban pynshlur bad thaw lad ïa ki nongsiat suloi ban poi sha ki kyrdan kham shakhmat ha ki lympung ïakop jong ka National bad International bad ruh shi bynta ban pynkhreh ha kaba ïa dei bad ka 6th Meghalaya Games ka ban long mynta u bnai ha Jowai bad Wahïajer, West Jaiñtia Hills.
Lah ban pynkynmaw ba ka West Jaiñtia Shooting Association (WJSA) ha ka 5th Meghalaya Games kaba la long ha Tura, lyngba u Wanmi Sumer ka la ïoh ban khur kawei ka takma ksiar ha ka kyrdan Open Sights 50.
Ïa kane ka prokram ai jinghikai yn pynlong ha ka Lah Sngi U Blei.
