Shillong, K’lyngkot 06
Ka lympung ïalehkai Third Division Cricket League 2024-25 ba la pynïaid da ka Shillong Cricket Association (SCA) ka la nangjam shaphrang ha kaba ka Innings Star bad ka Youth Star ki la ïoh jingjop ha ka Lah Sngi U Blei.
Ha kane ka jingïakhun kaba la long ha madan Urkaliar, Shillong, ka Innings Star ka la pynliem noh ïa ka Super Challenger Club da 47 run. Ka Innings Star kaba la shimti ban tied nyngkong, ka la ïoh 143 run bad shah pynhap 9 wiket ha ki 20 over. U Deepak Purkaystha u la tied 40 run na ki 34 bol bad u Depender Singh u la ïoh 23 run na ki 13 bol. Katba u Biplove Bhowmick u la ïoh 4 wiket bad 2 wiket da u Arun Sewa.
Haba wan beh ïa ka thong, ki nongtied ka Super Challenger Club kim shym la lah ban ïalehkai bha ha kaba ki la shah pynhap 10 wiket bad ban ïoh tang 96 run ha ki 13.1 over. U Rahul Sharma u la tied 23 run na ki 18 bol bad u Kyrmen Nongrum u la ïoh 14 run na ki 5 bol. Katba u Sumit Narazary u la shim 4 wiket bad u Marshal Marbaniang u la ïoh 2 wiket. Ïa ka nam Player of the Match la khur da u Sumit Narzary.
Haba phai sha kawei pat ka jingïakhun ba ar, ka Youth Star ka la jop da 7 wiket ïa ka Shibakha. Ka Shibhaka kaba la kam trai ban tied nyngkong, ka la ïoh 114 run bad shah pynhap 10 wiket ha ki 16.2 over. U Fullmoon u la tied 33 run na ki 29 bol bad u Daniel Inagari ula ïoh 23 run na ki 17 bol. Katba u Suraj Sharma u la shim 4 wiket bad 2 wiket da u Mrinmoy Das.
Haba wan shimti ïa ka palai ba ar, ka Youth Star ka la kynjoh sha ka thong da kaba ïoh 118 run bad shah pynhap 2 wiket ha ki 10.3 over. Kane ka la wan lyngba ka jingïalehkai bha u Kunal Chakraborty uba la lah ban ïoh ïa ka shiteng spah (54 run na ki 27 bol) bad u Bijou Kanu u la ïoh 34 run na ki 18 bol. Katba u Samir Sahani bad u Sunil ki la shim mar shi wiket. Ïa ka nam Player of the Match la khur da u Suraj Sharma.
