Shillong, K’lyngkot 06
Ka jingthrang bad ka jingangnud ka Meghalaya Cricket Association (MCA) ha kine ki khyndiat snem ba la dep ban seng ïa ki jaka bad ki jingtei kiba ïadei bad ki jaka ïalehkai khnang ban pynshlur bad ban pynpaw pyrthei ïa ki sap ïalehkai kriket ha kylleng ki district jong ka Jylla, ka la wan urlong ha West Jaiñtia Hills District.
Kane ka la wan hadien ba ka MCA bad ka West Jaiñtia Hills District Cricket Association (WJHDCA), ha ka 4 tarik mynta u bnai ki la pyndep ïa ka jingsoi soskular na ka bynta ban thaw ïa ka madan ïalehkai kriket ha Mukhla. Ïa kane ka soskular la soi ha ki lai liang mamla hapdeng ka Dorbar Pyllun jong ka Mukhla, ka West Jaiñtia Hills District Cricket Association bad ka Meghalaya Cricket Association ha kaba ka jingheh jong katei ka jaka long 5.93 akar.
Ïa katei ka jaka la ithuh da ka jingshimkhia jong ka WJHDCA ryngkat ka jingkyrshan jong u MLA ka thaiñ u Bah Wailadmiki Shylla uba dei ma u hi uba ïeid bha ïa ka jingïalehkai kriket bad ka jingïatreilang jong ka Mukhla Dorbar Pyllun. Ha kane ka jingïasoi ïa ka soskular ba la pynïaid da u Bah Eddystone Shylla, President ka WJHDCA la wan ban ïashim bynta da u Bah Wailadmiki (MLA), u Naba Bhattacharjee, President ka MCA, Bah Rayonald Kharkamni, Vice President ka MCA, u Dhrubajyoti Thakuria, Treasurer ka MCA, u Weibor Sohlang, Secretary bad ki dkhot ka WJHDJM nalor u President u Bah Hachwa Suna, General Secretary jong ka Mukhla bad kiwei.
Na ka liang u President ka MCA haba ai jingkren u la pynpaw ka jingsngewnguh kaba khraw ïa ka Dorbar Pyllun jong ka Mukhla halor ka jingsbun jong ki ban mynjur ban aiti noh ïa ka jaka kaba don ha rud surok, tang khyndiat kilometre na surok bah. Shwa ban pyndep ïa ka jingïasoi, ka kynhun baroh kawei ka la jurip ïa ka jaka bad pynpaw ïa ka jingsngewhun halor ka jinglong jong ka jaka na ka bynta ka jingïalehkai kriket. Ka madan ïalehkai phutbol kaba dangdon hapdeng ka jingtei, ha ka jaka kaba don marjan. Ka MCA ka la shim khia ban kyrshan ïa baroh kum kine ki jingthmu ban pynkhlaiñ ia ka jingpynroi ka kriket naduh ki rta kiba dangrit haduh kiba la heh la san.
