Shillong, Risaw 27
Kiba bun na ki rangïalehkai ka thaiñ West Khasi Hills ki la pynpaw ka jingdiaw mynsiem halor ka jinglong mynthi bad kuman da ki bor pynïaid ka Nongstoiñ District Sports Association (NDSA) ki bym shym la lah ban pynlong ïa ki lympung ïalehkai phutbol mynta la ar snem kynthih.
Kat kum ka jingïoh lum jingtip la ong ba ka NDSA kam shym la lah ban pynlong ïa ki lympung ïalehkai phutbol naduh ka Super, First, Second bad ka Third Division ha u snem 2025 bad 2026, hynrei ka daw jong kane ka jingbym lah ban pynlong ym shym la lah ban ïoh ïa ki jingtip kiba thikna namar ka jingïakynnoh ka long hapdeng para nongkitkam.
Haba pyrshang ban ïakren bad ki katto katne ki nongïalehkai phutbol katei ka thaiñ ki la pynpaw ïa ka jingdiaw mynsiem namar ka jingbym shim khia ki bor pynïaid ka NDSA bad kane ka la pynduhnoh ïa kiba bun ki nongïalehkai khamtam leilei ba ka jingïalehkai phutbol ha kane ka Jylla ka la long kaba paw bad kaba wan ba nyngkong na baroh ki jait jingïalehkai.
“Ngi sngew lyngngoh ïa ka jinglong mynthi ki bor pynïaid ka NDSA namar kim shym la don ka jingkitkhlieh na ka bynta ka lawei jong ngi ki nongïalehkai bad kan buh jingeh ruh ïa ka district hi baroh kawei namar kumno ka NDSA ka lah ban phah kynhun ban leit shim bynta sha ka Meghalaya State League ka ban long ha u snem ban wan,” ka pynpaw ki nongïalehkai.
Haba ïakren bad u nongthoh khubor, u President katei ka synjuk u Bah B. Kharlor u la pynpaw ba ka council kan sa shong jingïalang ha ka 29 tarik mynta u bnai Risaw ha Nongstoiñ khnang ban shim ïa ka rai.
“Ha ka jingshisha ka dei ka kamram u Secretary Bah D. Marngar u ban pynbeit ïa ki kam ki jam jong ka synjuk halor ki lympung ïalehkai phutbol. Hooid ngim shym la lah ban pynlong ïa ki lympung ïalehkai naduh u snem 2025 bad ka long ruh ka jingduh kaba khraw ïa ki nongïalehkai.”
