Khliehriat, Risaw 27
Ka Diengshynrum SC bad Thangskai Tiger SC ki la khur jingjop ha ka lympung ïalehkai Super Division na ka bynta ka 6th Kyrmen Shylla Contribution Trophy ba la pynïaid da ka East Jaiñtia Hills District Football Association (EJHDFA).
Ha ka jingïalehkai kaba nyngkong kaba la long ha ka sngi Ba-ar ha madan Diengshynrum ha Khliehriat, ka Diengshynrum SC ka la pynliem noh ïa ka Sutnga SSCC da 3-2 kol.
Ïa ki kol na ka Diengshynrum la thep ar kol da u Rumi Lyngdoh (26 & 65), bad ïa kawei pat la thep da u Shining Marbaniang (48). Na ka liang ka Sutnga ka la pynphai kylla ar kol lyngba u Alwinson Bareh (81) lyngba ka penalty bad kawei pat da u Ker Syrti (88).
Haba phai sha kawei pat ka jingïalehkai kaba bud, ka Thangskai Tiger SC ka la jop da 2-1 kol ïa ka Byndihati CSC.
Ka Thangskai Tiger ka la ïoh ei shi kol na ka daw ka jingbakla thep hi u rangapkol ka liang pyrshah u Robert Lapasam ha ka minit kaba 16 bad kawei pat da u Bobbyson Nongtdu (83) lyngba ka penalty. Na ka liang ka Byndihati ka la pynphai kylla shi kol lyngba u Philemon Dkhar (41).
