Amlarem, Risaw 27
Ka Shmiapang, Mupyut Dongnein, bad Sengsamla Amlanai ki la khur jingjop ha ka 3rd Division Football League ba la pynïaid da ka Amlarem Sub-Divisional Sports Association (ASSA) ha ka sngi Ba-ar ha Mini Stadium Lapajlem, Amlarem.
Ha ka jingïakhun kaba nyngkong, ka Shmiapang ka la pynliem noh da 2-0 kol ïa ka Ammutong Pyrshang. Ïa kine la thep da u Sbunki Khyriem (42) bad u Arimaïa Khyriem (58).
Ha ka jingïalehkai kaba bud, ka Mupyut Dongnein ka la jop da 2-1 kol ïa ka Krangpamtadong CSC. Ïa ki kol jong ka Mupyut la thep da u Dao Dkhar (17) bad u Munlait Kyndiap (61), katba ka Krangpamtadong ka la pynphai kylla shi kol lyngba u Hamio Rasmut (50).
Ha kawei pat ka jingïalehkai, ka Sengsamla Amlanai ka la jop da 2-1 kol ïa ka Veteran. Ïa ki kol na ka Sengsamla Amlanai la thep da u Wanbiang Lang-shiang (14) bad u Hamesha Khongiong (45), hynrei ka Veteran ka la pynphai kylla shi kol lyngba u Kallis Pohleng (38).
