Shillong, Risaw 27
Ka Jakrem Sports Club ka la bteng biang ïa ka jingjop ha ka wat kaba nyngkong jong ka Indian Women’s League 2, hadien ba ka la pynliem noh ïa ka Kemp FC da 3-2 kol ha ka sngi Ba-ar ha SSA Stadium, Polo.
Kane ka nam jop ka la wan urlong lyngba ka Darishisha Kharlyngdoh, Marbarin Nongrum bad ka Makrisha Songthiang na ka bynta ban pynlong ïa ka Jakrem ba kan kamai 6 poiñ ha ka Group-C na ki ar sien ïakhun.
Haba phai sha ka jingïakhun ka la long kaba itynnad bad kaba ïakhaid bha, hynrei ha ka minit kaba nyngkong ka Kemp ka la pynkhih jar nyngkong lyngba ka Puja Pachi. Hynrei hapoh shiteng kynta ka Jakrem ka la lah ban pynphai kylla ar kol lyngba ka Darishisha Kharlyngdoh (19) bad ka Marbarin Nongrum (25). Haduh kaba kut jong ka kylla step ka Jakrem ka dangdam da 2-1o kol ïa ka liang pyrshah.
Hadien katto katne por ba la bteng ïa ka jingïakhun jong ka kylla miet ka Kemp ka la lah ban pynïakhaid kylla lyngba ka Aarushi Santhosh ha ka minit kaba 63. Hadien lai minit ka Makrisha Songthiang ka la lah ban thep ïa ka kol kaba lai na ka bynta ka Jakrem.
Watla ka Kemp ka la pyrshang ban ïakhun tyngeh na ka bynta ban pynphai, hynrei ki ‘thei ïalehkai ka Jakrem ki la lah ban ïashan tyngeh ban pyllait na ka jingshah thep bad ha kaba kut ka la lah ban khur syndon ïa ka jingjop. Ïa ka nam Player of the Match la khur da ka Makrisha Songthiang
Ha ka jingïalehkai kaba nyngkong ka Jakrem ka la pynliem ïa ka AIFF TDS Academy da 2-1 kol.
Te kumta ka Jakrem kan pynkhreh a ka jingïalehkai kaba lai bad kaba khatduh pyrshah ïa ka Mumbai Knights ha ka sngi Palei ha ka por 2:30 nohphai sngi.
