Shillong, K’lyngkot 07
Ki khynnah ïalehkai ka Don Bosco Soccer Academy (DBSA) ki la long kum lahduh ha ka lympung ïalehkai (L) Josephine Kharkongor U-13 Memorial Football Tournament, hadien ba ki la pynliem noh ïa ka Josephine Kharkongor FC da 2-1 kol ha ka jingïakhun phainal ba la long ha ka Sngi Ba-ar ha madan ïalehkai jong ka Rangdajied United FC Performance Centre.
Kane ka la wan hadien ba ki khynnah ïalehkai ka DBSA ki la ïoh ban thep ha baroh ar kylla jong ka jingïakhun, katba ka shi kol jong ka JKFC la thep shwa ban wai lyngba ka penalty.
Shwa ka jingpynïakhun ïa kane ka phainal, la pynlong shwa ruh ïa ka jingïakhun ban ïaknieh ïa ka kyrdan balai (third place), kaba hangne ka kynhun ba la rah ïa ka jingjop dei ka Pay For Right (PFR) hadien ba ka la pynliem noh ïa ka Mawlai Grassroot Centre.
Ka jingpynlong ïa kane lympung, ka dei artad ka sngi lyngkhuh snem kaba saw snem jong ka jingkhlad noh jong I (L) Kong Josephine Kharkongor ba la wan ban sakhi lang da ki khun ki kti, ki khun ksiew jong i. La ïadon lang u Rangbah Shnong ka Pynthor, Bah Syrpai Marbaniang kum u kongsan bad u Bah Eugeneson Lyngdoh.
Shwa ban sdang ka jingïakhun phainal, ka la don ruh ka jingduwai kaba la ai da u Fr. Anthony Kharkongor, nangta ka jingrwai kaba la ai kyrpang na ka ïing ka sem, ki jingshad bad hadien kane la sdang pat ïa ka jingïalehkai phainal.
Ha kaba kut jong ka jingïakhun, ka la dei pat ka pali ban sam ïa ki khusnam, ha kaba la ïarap ban sam lang da ki rangïalehkai barim kiba kynthup ïa u Bah Richard Nongneng, Bah Freddy Kharpran, nalor u Bah Khlaiñ Pyrkhat Syiemlieh bad kiwei kiwei.
Ha kane ka sngi ka la don ruh ka jingsam ïa ki khusnam shimet kaba kynthup ïa ka nam Best Goalkeeper kaba leit sha Denzil Kharngi ka RUFC, Top Scorer ka leit sha u rangïalehkai ka PFR u Habankara Blah, uba la thep 10 tylli ha kane ka lympung bad Player of the Tournament la ïohpdiang da u Bashemphang Diengdoh.
