Shillong, K’lyngkot 07
Ka Nangkiew Irat SC bad ka Rangdajied United FC ki la lah ban pyni ïa ka jingryngkat bor hapdeng jong ki ha ka OC Blue Shillong Premier League 2024 hadien ba kim shym la lah ban thep kol haduh kaba kut jong ka jingïa-lehkai ha ka Sngi Ba-ar ha SSA Stadium kaba ha First Ground, Polo.
Kane ka long ka sien ba ar ba kine kynhun kin ïakhaid khlem don ba thep kol ha ki 38 sien ïakhun jong kane ka lympung wat hapdeng ka jingïakhun kaba ïakhaid bha kaba la neh haduh 90 minit.
Kane ka jingïakhaid ka la pynlong ïa kine ki kynhun ban ïa ryngkat mar 13 point kumjuh ruh bad ka Nongrim Hills SC. Ka Rangdajied ka la lah ban pynliem teng ïa ka Nongrim Hills bad kumta ka RUFC ka la don ha ka kyrdan balai, katba ka Nongrim Hills ka la hiar sha ka kyrdan basaw bad ka Nangkiew Irat sha ka kyrdan basan.
Kane ka jingïakhaid ka la pyndiaw mynsiem na ka bynta ka Rangda-jied, kaba la jop ha baroh saw sien ki jingïakhun ba la dep.
Ki rangïalehkai ka Rangdajied ki la sdang ban ïalehkai bha ha kaba u Benny Vianney Khriam u la ïoh ïa ka kabu kaba biang, hynrei ka jingpyrshang ka jong u ka la long lehnohei hadien ba ka bol kaba u la ïoh ban kynjat ka la leit dei na diengkol tang shi minit ba la sdang ka jingïalehkai.
Ka Nangkiew Irat ka la ïoh ïa ka kabu ksiar lyngba u Wallamsuk Nong-khlaw, hynrei um shym la lah ban pynurlong wat la ki rangïalehkai shadien ka RUFC kim shym la lah ban kyrda. U rangapkol ka Rangdajied, u Meshan Banjop Sumer u la mih shakhmat ban khanglad ïa utei u rangïalehkai sha-khmat ka Nongkiew.
Ha kaba kut jong ka jingïalehkai ka Rangda-jied ka la ïohpdiang ar tylli ki corner bad ka free-kick, hynrei kam shym la lah ban thep kol. Wat la u R.T. Hanson Pdang u la ïoh ïa ka kabu kaba biang, hynrei u rangapkol ka Nangkiew Irat, u Rihok-lang Khongjoh u la lah ban khanglad na ka jingshah thep.
Ka jingïakhun ha ka Sngi Balang kan long hapdeng ka lahduh jong ka aïom ba la dep, ka Mawlai SC pyrshah ïa ka Langsning FC ha ka por 2:30 nohphai sngi.
