Shillong, K’lyngkot 08
Ka lympung ïalehkai 6th Meghalaya Games 2025 kan sdang naduh 20 tarik mynta u bnai ha Jowai, West Jaiñtia Hills, la pynpaw u Myntri ka tnat ïalehkai ka Sorkar Jylla, Bah Shakliar Warjri ha ka Sngi Balang.
Ha kane ka lympung kin don palat 4,000 ngut ki nongïalehkai bad 450 ngut ki official ban wan shim bynta ha kane ka lympung kaba heh duh ka jylla ka ban neh san sngi.
U Bah Shakliar haba pynpaw ha ki lad pathai khubor, u la ong ba ka jingpynkhreh pynkhrum ban pynlong ïa kane ka lympung ka la ïaid shakhmat lait noh ar tylli ki jingïalehkai (golf bad swimming) ïa kaba yn hap ban pynlong ha ka nongbah Shillong namar ym pat shym la lah ban pynbiang jaka ïalehkai ha katei ka district.
