New Delhi, Kyllalyngkot:
U Myntri ka koit ka khiah jong ka Delhi, u Saurabh Bharadwaj, u la bthah ïa ka tnad ka koit ka khiah jong ka nongbah, ba kan long kaba la pynkhreh pura ban tehlakam ïa ka jingkiew kaba lah ban mih na ki jingpang ba ktah ïa ki bor ring bad pynhiar mynsiem, hadien ba la lap ïa lai ngut kiba ïoh ïa u khñiang jingpang Human metapneumovirus (HMPV) ha ka ri.
Ha ka hukum, u Myntri ka koit ka khiah u la pynpaw ba namar ki jingpang ba la lap hapoh ka ri India bad ka jingsaphriang jong u khñiang jingpang ha ka pyrthei, ka jingpynkhreh ha ka nongbah jong ka ri ka long kaba donkam tam.
“La bthah ba ka Health and Family Welfare Department ka dei ban buddien bha ïa kino kino ki jingjia kiba kum kine ha ka ri. Ki dei ban ïakynduh ïa ka tnad ka koit ka khiah jong ka sorkar pdeng ban ïoh jingtip ha ka por kaba biang shaphang ka jingpynkhreh ha ka nongbah. Ka long kaba kongsan ba ki hospital ha Delhi ki dei ban long kiba la pynkhreh bha ban ïakhun ïa kano kano ka jingkiew kaba lah ban mih na ka jingpang pynhiar mynsiem katkum ka jingai jingmut jong ka tnad ka koit ka khiah jong ka sorkar pdeng,” la pule ha ka kyrwoh.
U Bharadwaj u la bynrap ruh ha ka hukum ba lada jia ba don kano kano ka kam kaba kyrkieh kaba donkam ban wanrah sha ka jingtip jong u, lah ban ïakren ïa u ha ka phone ruh kumjuh, khnang ba kan ym don kano kano ka jingpynslem ha ka jingtreikam.
U la bthah ïa u Secretary ka koit ka khiah ban jurip markhmat ïa ki lai tylli ki hospital ha Delhi man ka sngi, ban sdang na kiba heh tam, bad ban ai ïa ka kaiphot man ka sngi sha u Myntri ha kaba ïadei bad ka jingdon ki dawai, ki jingthiah ICU, ka rukom treikam jong ki tiar Radiological, ka jingdon ki Data Entry Operator ha OPD bad kiwei kiwei.
Ka Indian Council of Medical Research ka la lap ïa arngut ki nongpang HMPV ha Karnataka lyngba ka jingjurip man ka por na ka bynta ki khïiang jingpang kiba la ïoh na ki Respiratory Viral Pathogens, ong ka tnad ka koit ka khiah jong ka sorkar pdeng ha ka lah sngi U Blei.
La lap ba uwei u khyllung ba dang lai bnai bad uba dang 8 bnai, ki don ïa une u khñiang jingpang. Baroh arngut ki don ka histori jong ka jingpang Bronchopneumonia.
Ka jingpang kaba lai, ka la mih ha Gujarat, ha kaba la lap ïa kawei ka khynnah, kaba don ïa ka jingpang HMPV, hadien ba la shah sumar ha hospital, ha ka 24 tarik, Nohprah bad ka jinglong jingman jong katei ka khynnah, ka long kaba thikna mynta.
U khnñiang jingpang HMPV u dei u khñiang jingpang ba ju don ha ka jingring mynsiem uba ju pynmih ïa ki dak kum ka jingsuhkhriat.
Ki jingpule ki pyni ba u la saphriang ha ki briew naduh ki snem 1970, watla la ithuh nyngkong eh da ki stad saïan ha u snem 2001. Une u khñiang jingpang u don 4-16% na ki jingpang ring bad pynhiar mynsiem ha ka pyrthei, ha kaba ki jingpang ki ju kiew bha hapdeng u bnai Naiwieng bad Jymmang.
Katba kiba bun ki rangbah ki la ïoh ïa ka jingkoit jingkhiah lyngba ka jingshah ktah mynshuwa, u HMPV u lah ban pynmih ïa ki dak kiba kham jur ha ki khyllung kiba ïakynduh ïa u ha ka sien kaba nyngkong bad ha ki briew kiba don ka met kaba la tlot.
