Shillong, K’lyngkot 08
U Myntri ka tnat ïalehkai ka Sorkar Jylla, Bah Shakliar Warjri, u la leit ïakynduh ïa u Myntri ka tnat ïalehkai ka Sorkar Pdeng, Dr. Mansukh Mandaviya bad ai syndon da ka dorkhas halor ka jingthmu ban pynlong ïa ka 39th National Games hapoh kane ka Jylla.
Ïa kane la pynpaw da utei u Myntri ha ka Sngi Balang ha ki lad pathai khubor hadien ba u la leit ïakynduh ïa u Dr. Mansukh ha u bnai Nohprah mynshem snem.
Haba ïakren bad ki lad pathai khubor, u Bah Shakliar u la pyntip ba ïa kane ka lympung ïalehkai ba heh duh hapoh ka ri la thmu ban pynlong ha u snem 2027.
Haba ïadei bad ka jingpynkhreh ban pynlong ïa kane ka lympung khamtam ki jaka ne ki madan ban ïalehkai, u Bah Shakliar u la ong ba kumba ka long ka Jylla ka don ïa ka thong ban pynkhreh tangba lada jia ba ïoh shisha ban yn long pat ïa kane ka lympung, ka jingpynkhreh hi kan hap ban long kaba ïaid sted bad kaba janai.
Haba ïadei bad ka jingpynlut pisa, u Bah Warjri u pynpaw ba ïa mynta, kaei kaba la ïaid hakhmat hi ka long tang ka jingdep ban ïakynduh ïa utei u Myntri ka Sorkar Pdeng, bad ynda haba la pdiang ïa kane ka jingtyrwa na ka liang ka sorkar kan sa pynkhreh pat ïa ka jingdonkam ïa ka pisa ban pynlut.
