U Nongsaiñ Hima,1969
Ka kam Telengana bad ka election ban jied ïa u President ka India ki la pynshaïong shibun eh ïa ka jingmut jingpyrkhat jong ki nongïalam congress, la ha ka liang sorkar ne la ha ka liang ka seng.
Uwei u kynnoh pop ïa uwei pat ïa ka kam Telangana ba ka leit jia haduh katne. Kum ban shu ai nuksa, u Morarji Desai bad u Chavan ki kynnoh pop ïa ka MRs. Gandhi ba ka khang ïa ki ban tuklar bad pynbeit ïa ka kam Telengana haba ka dang sdang. Ka Mrs. Gandhi ka kynnoh pop ïa u Brahmananda Reddy namar ba u ai ktien ba u lah ban pynjem ïa ka kam Telengana. La ngeit ruh ba u Lat ka Jylla u kyrshan ïa ka jinglah jong u Myntri Rangbah ka Jylla u Brahmananda Reddy.
U Sanjeeva Reddy u kynnoh pop ïa u Brahmananda Reddy ba u pynpait pynpra ïa ka Jylla da ki kam ïashah shiliang jong u bad ba u khlem da kheiñ snep ïa ki ktien jong u (Sanjeeva Reddy) ba u dei ban ieh noh ïa ka kam Myntri Rangbah bad ban pynlong Myntri Rangbah da uba na Telangana ne shim briew thymmai ha ka kynhun ki myntri jong u. U Myntri Rangbah na ka liang jong u, u kynnoh pop ïa u Sangjeeva ba ki kyrshan ïa ka kynhun kaba ïeng pyrshah ïa u Brahmananda Reddy.
Ki khlieh – duh ka congress ki ngeit ba ïa kane ka jingïakhih ha Telengana la pynkhih bad ai mynsiem ba u Dr. Chenna Reddy bad u Konda Lakshman Bapuji na ka daw ka jingshun ïa u Myntri Rangbah ka Jylla bad kumta ki riew sniew ki shim ïa ki kabu ban pynshit shuh shuh ïa ka kam.
Ka jingshisha ka long ba dei ban kynnoh pop ïa baroh na ka bynta ka kam Telengana. Ki nongïalam Congress ki la dei ban pynjem ïa ka kam Telengana ha ka por kaba biang. Ka kynhun ki Myntri ka Sorkar Kmie bad ki nongïalam ka seng Congress kim ïa dei jingmut bad ki ïapher jingmut ïa ka lad kaba dei ban leh. Kawei ka liang ka ong ba ka sorkar kmie kan kham khlaiñ lada la don 30 tylli ki jylla ha ka jaka jong ki 17 tylli ki Jylla kumba ki don mynta bad ai ba ka Telengana kan long ka daw ban saiñdur ïa ki Jylla ha ka ri.
Kawei pat ka liang ka ong ba ka jingsniew la pynmih da ka report jong u Fazel Ali (kaba ai jingmut ba ka Telengana ka dei ban ioh ïa ka jylla na ka bynta san snem bad hadien kata kan sa jied hi la kan ïasoh bad ka Andhra) bad ïa kane ka report dei ban pynduh ïa ka bad ba ka ri baroh kawei dei ban pynïabynta ha ki 5 tylli ki presidency. Namar ba kine ki lad kim long kiba bit, ai ba kan jia katba ka jia.
Ha ki khyndiat taïew ba la dep la don ka jingpyrshang ban wanlam lang ïa ka arliang ki dkhot congress ban don ka jingïasngewthuh jingmut para para maki bad imat ba kane ka jingpyrshang ka la thap long kam. Kum ban shu pynkyhnmaw, ka Mrs. Gandhi la ka wanlam ïa u Dr. Chenna Reddy ban pynlong Myntri ïa u ha ka kynhun myntri ka Sorkar Kmie bad ïa kane la leh da ka jingkyntu jong u Brahmananda Reddy ban pyntlot ïa ka bor jong u Sanjeeva Reddy. Ka jingpynpaw pyrshah bad ka jingbym ioh ka jingkyrshan na ka Mrs. Gandhi, u Myntri Rangbah ka Jylla (U Brahmananda Reddy um shym la klet ba dei ka Synicate, ym ka Myntri Rangbah, kaba kham don bor ha ki nongïalam ka seng congress bad un tlot lada ka Syndicate kam treh ban kyrshan ïa u. Dei na kane ka daw ba u Brahmananda Reddy u la kyrshan ïa u Sanjeeva Reddy ba dei ban jied ba un long u President ka India pyrshah ïa ka mon jong ka Myntri Rangbah. Dei ka kamram ïa uba la ngeit ba u la don ka jingkren bad u Brahmananda Reddy.
Katba kine kiei kiei ki dang jia, la don ka jingkynthoh pyrshah ïa ka Mrs. Gandhi da ki ‘riewpawkhmat kiba kynthup ruh ïa ki dkhot congress, ïa ka jingleit bar ri khah khah jong ka. Ki sngew ba ha ka jaka ba kan leit sha Japan bad Indonesia ha kum kane ka por bad donkam eh, ka la dei ban leit pynban sha ki bynta bapher bapher jong ka Telengana ban ïarap ban wanlam ïa ka suk ka saiñ ha ka jylla Andhra. La ngeit ba ynda la shong dorbar ka Lok Sabha, ka Myntri Rangbah kan ym lah da lei lei ban iehnoh ïa ka New Delhi. Ka la dei ban pyndonkam ïa kine ki por ki bym shong dorbar ka Lok Sabha, ban leit sha ki bynta jong ka ri kiba don ha ka jingïakhih.
Kane ka jingpynbeit jong ka ban leit sha Japan bad Indonesia ha kum kane ka por ka la long kaba khlem pyrkhat, namar kane ka la ai lad ïa ki nongïalam Telengana ban ym treh ïa kren bad kiwei pat ki myntri ka sorkar India. Kumta ki la lah ban nang kham pynsniew shuh shuh ïa kam Telengana. La kdew ruh ba ki jingleit sha Japan bad Indonesia kin ym lah ban seisoh eiei ne kyntiew burom ïa ka Ri India ha khmat ki nongïalam kita ki ri ha kum kane ka por haba ka ïing la jong ka don hapdeng, lah ban ong, ka jingpluh.
