London, K’lyngkot:
Katkum ki khubor, la ong ba ha kane ka jingjia ba sngew shyrkhei, uwei u khynnah rit ba dang 14 snem ka rta, u la shah dung pyniap hapoh ka bos paidbah wat ha ka por mynsngi-mynshai bad kane ka la jia ha London ha ka Sngi Ba-ar.
Utei u khynnah u la shah pyniap ha kawei na ki bos rong saw ba ar mala ba la tip bha jong ka nongbah ha Woolwich kaba don sha ka phang Shathie Lam Mihngi jong ka nongbah London.
La ong ba wat la ka kynhun ki nongsumar ka la poi sha katei ka jaka ban ioh ai ka jingsumar kaba kyrkieh ia utei u khynnah namar ka jingmynsaw na ka jingshah dung tari ha katei ka jaka, hynrei ka long pat kaba sngewsih ba kim shym la lah shuh ban pynim ia u. Utei u khynnah u la khlad noh tang hadien katto-katne por hi mar ia poi ki nongsumar hi ha katei ka jaka.
Kane ka jingjia ka la jia hadien ba kawei ka khynnah kynthei kaba dang 11 snem ka rta ka la mynsaw jur na ka jingshah dung tari ha ka jaka paidbah ba bun briew bha jong ka Leicester Square ha London ha u bnai Nailar jong u snem ba la dep, ha kaba ki pulit ki la ioh kem noh ia uwei u rangbah ba la 32 snem ka rta haba iadei bad kane ka jingjia.
Ha u Nailur ruh, uwei u samla u la shah dung tari ha katei hi kajuh ka jaka jong ka Woolwich bad 3 ngut ki samla ki la shah pynngat kyndon bad kin sa shah rah hakhmat ka ïingbishar halor katei ka kam runar bad ka kam pyniap briew kaba u nongmudui u la ong ba ka long ka jingpynhiar kput halor ki jingiakynad kiba la mih ha katei ka ri ha kine ki sngi.
