Shillong, K’lyngkot 10
Ka jylla Meghalaya kan phah ïa ka kynhun ïalehkai ban leit shim bynta ha ki hynriew tylli jingïalehkai ha ka 38th National Games 2025 ka ban long ha Uttarakhand naduh 28 tarik mynta u bnai haduh 14 tarik u Rymphang.
Kine ki kynthup ïa ka Archery, Kanoying bad ka Boxing ki la ïoh rung beit-beit (direct entry), katba ka Archery, Rowing, Athletics, Swimming bad ka Wushu ki dei kiba la ïoh rung lyngba ka ‘wild card entry’. Ïa kane la pynpaw da u General Secretary ka Meghalaya State Olympic Association (MSOA) u Bah Finely Pariat ha ka sngi Thohdieng.
Haba ïakren bad u nongthoh khubor, u Bah Pariat u la pynpaw ka jingpynkhreh ka dang ïaid shakhmat na ka bynta ban leit shim bynta sha katei ka lympung. “Baroh ki kynhun ki la pynkhreh ïa ki nongïalehkai ki ban leit shim bynta ha kitei hynriew tylli ki jingïalehkai bad ngi khmih lynti ba kin lah ban pynpaw ïa ka jingtbit ha katei ka lympung na ka bynta ban wanrah burom ïa ka Jylla hi baroh kawei.”
Lah ban pynkynmaw ba ha ka 37th National Games 2023 kaba la long ha Goa, ka Meghalaya kam shym la lah ban khur wat tang kawei ka takma, katba kiwei ki jylla ka thaiñ shatei lammihngi ki la lah ban pynpaw ïa ka jingtbit jong ki.
