Shillong, K’lyngkot 10
Ka rukom pynkhreh-pynkhrum na ka bynta ka 6th Meghalaya Games 2025 ka ban long ha West Jaiñtia Hills District ka dang ïaid shakhmat naduh ki jaka ïalehkai, ki jaka sah jong ki nongïalehkai bad kiwei kiwei ki jingdonkam.
Ïa kane ka lympung ïalehkai yn pynlong ha Jowai bad kumjuh ha Wahïajer ka ban sdang naduh 20 bad pynkut ha ka 25 tarik mynta u bnai, ha kaba yn wan shim bynta palat 4,000 ngut ki nongïalehkai bad 450 ngut ki official na kylleng ki district jong ka Jylla.
Haba ïakren bad u nongthoh khubor ha ka Sngi Thohdieng, u General Secretary ka Meghalaya State Olympic Association (MSOA), Bah Finely Pariat, u la pynpaw ba ka jingpynkhreh ka dang ïaid shakhmat. “Kumba ka long mynta haduh khyndai phew na ka shispah la lah ban pyndep bad sa tang shiphew na ka shispah kiba dangsah ban pyndep kum ki jingpynkhreh pynkhrum ïa ki jaka ïalehkai.”
Kumba ka long mynta ka jingpynlut na ka bynta kane ka lympung ïalehkai ha West Jaiñtia ka long T. 35 klur bad ka la tam na kaba la pynlut ha ka 5th Meghalaya Games 2024 kaba la long ha West Garo Hills.
U Bah Pariat u la ïathuh ba ka sor Jowai mynta ka la thaba khrek lyngba ka jingwan ka Meghalaya Games namar ki indoor stadium, ki lynti-syngkieñ bad ki shnong ki thaw ki la phuh-phieng bad itynnad bha.
Wat la baroh ki jaka ïalehkai ki dang ïaid shakhmat ki jingpynkhreh na ka bynta ban pyndep ha ka por kaba biang, hynrei ïa ka jingïakop jngi bad ka ïakop siat suloi (shooting) yn hap ban pynlong ha nongbah Shillong na ka daw bym lah ban pyndep ha ka por kaba biang.
