Mumbai, Kyllalyngkot:
Ka jinghap kynsan jong ki shñiuh kaba la pynlong ïa ki nongshong shnong ba kin kulmar jingmut ha ki katto katne ki shnong jong ka distrik Buldhana jong ka Maharashtra, ka la pynmih ïa ka jingsyier, ong ki khubor.
Ki bor pynïaid ki la sdang ïa ka jingtohkit halor ki tyllong um ha ka thaiñ na ka bynta ka jingma kaba lah ban mih.
Ha kaba ïadei bad ka jingjia ki bor ba dei khmih kim pat tip haduh mynta ïa ka daw tynrai halor ka jinghap shñiuh ba kynsan kynsan jong kiba bun ki briew naba ka jingpyntreikam ka dang ïaid bteng.
Ki heh jong ka tnad ka koit ka khiah jong ka jylla, ki ïathuh ba 30 ngut ki briew ha ki shnong Kalvad, Bondgaon, bad Hingna ha Shegaon Taluka, ki la ujor ba ki shñiuh ki la hap stet bha.
La phah ruh ïa ki nongmuna um na kitei ki shnong ban khmih bniah ban peit la ka lah ban don jingsma.
U ophisar ka koit ka khiah jong ka District, u Amol Geete, u la ong ba ha kiba bun ki khep, ka dei ka jingpang khñiang ha ka sniehdoh, namar kata ki briew ki mad ïa ka jinghap shñiuh, la ong ki khubor.
“Tang shu ïoh jingtip, ngi la phah ïa u doktor sniehdoh bad ïa u doktor ba peit ïa ka jingpang khlam sha shnong na ka bynta ka jingtohkit ba nyngkong. Kumba 99 percent na ki nongpang ki pyni ïa ka jingpang khñiang ha ka sniehdoh, namar kane ki briew ki mad ïa ka jinghap ki shñiuh,” la bynrap ka tyllong khubor.
U Geete u la bynrap, “Ngin sa khmih bniah ruh ïa ka um ban peit la ki don ne em ki dak ki shin ha ka, namar ki pynkiew ïa ka jingpang khñiang. Ngin sa shim ïa ki nongmuna jong ka sniehdoh jong ki 2 haduh 4 ngut ki nongpang bad ngin phah ïa ki sha Akola Medical College ban leh ïa ka Microscopy.”
Nalor kata, ka kynhun jong ka tnad ka koit ka khiah ka la sdang ban jurip ha kitei ki jaka, bad ka jingsumar ïa kiba shah ktah ka la dep ban ïaid shakhmat, ong ka ophisar ka koit ka khiah jong ka Shegaon ka Dr. Deepali Bahekar.
“Ka tnad ka la sdang ban sumar ïa ki nongpang katkum ki dak jingpang, bad la shim ruh ïa ka jing-ai jingmut na ki riew shemphang ha ka liang ka sniehdoh”, la ong u Bahekar, katkum ka khubor.
